ആനക്കാംപൊയിൽ – മേപ്പാടി കള്ളാടി തുരങ്ക പാതയുടെ പ്രഖ്യാപനവും പദ്ധതി ഉദ്ഘാടനവും ഇന്ന്

കൽപ്പറ്റ:  ആനക്കാംപൊയിൽ –  കള്ളാടി – മേപ്പാടി തുരങ്ക പാതയുടെ 

പ്രഖ്യാപനവും പദ്ധതി ഉദ്ഘാടനവും

 ഇന്ന്  (05/10/2020 തിങ്കൾ) നടക്കും. രാവിലെ 10 മണിക്ക് മുഖ്യമന്ത്രി പിണറായി വിജയൻ  ഉദ്ഘാടനം നിർവഹിക്കും.

പൊതുമരാമത്ത് വകുപ്പിൻ്റെ നേതൃത്വത്തിൽ കിഫ്ബിയിൽ നിന്നും  658 കോടി രൂപ ചെലവഴിച്ചാണ് തുരങ്കപാത നിർമ്മിക്കുന്നത്. ഈ മേഖലയിൽ പ്രാവീണ്യം നേടിയ കൊങ്കൺ റയിൽവേ കോർപറേഷനെയാണ് തുരങ്ക പാതയുടെ നിർമ്മാണ പ്രവൃത്തി ഏൽപ്പിച്ചിരിക്കുന്നത്. സാങ്കേതിക പഠനം മുതൽ നിർമ്മാണം വരെയുള്ള എല്ലാ കാര്യങ്ങളും കൊങ്കൺ റയിൽവേ കോർപറേഷൻ നിർവഹിക്കും .

7.82 കിലോമീറ്ററാണ് പാതയുടെ ആകെ നീളം. ഇതിൽ 6.8 കിലോമീറ്റർ തുരങ്കമാണ്. 

കോഴിക്കോട് ജില്ലയിൽ തിരുവമ്പാടി നിയോജക മണ്ഡലത്തിലെ മറിപ്പുഴ എന്ന സ്ഥലത്തു നിന്നും നിർദിഷ്ട തുരങ്കപാത ആരംഭിച്ചു കൽപ്പറ്റ നിയോജക മണ്ഡലത്തിലെ കള്ളാടിക്കു സമീപം അവസാനിക്കും. തുരങ്കപാതയിലേക്ക് എത്തിച്ചേരാനായി കോഴിക്കോട് ജില്ലയിൽ കുന്നമംഗലത്തു ദേശീയപാത 766 ൽ നിന്ന് വഴി മാറി നിലവിലുള്ള പൊതുമരാമത്തു വകുപ്പിന്റെ റോഡ് ഉപയോഗപ്പെടുത്തും. സംസ്ഥാനത്തിൻ്റെ വികസന രംഗത്തെ പുതിയ ചുവടുവെപ്പാകും തുരങ്ക പാതയെന്നാണ് സർക്കാർ അവകാശവാദം. 

നടപടികൾ പൂർത്തിയാക്കി മാർച്ചിൽ നിർമ്മാണം തുടങ്ങാനാണ് ലക്ഷ്യം.