ചുണ്ടക്കൊല്ലി റോഡിലെ ഓവുചാൽ വൃത്തിയാക്കണം

പുൽപ്പള്ളി : പുൽപ്പള്ളി ട്രാഫിക്ക് ജംഗ്ഷനിൽ നിന്ന് ചുണ്ടക്കൊല്ലി  റോഡിലേക്കുള്ള ഓടകളും, റോഡും തകർന്നു തരിപ്പണമായിട്ട് മാസങ്ങളായി. ഓവുചാലുകൾ തകർന്നു കിടക്കുന്നതിനാൽ വെള്ളം മെയിൻ റോഡിലെ ഓടയിൽ നിന്ന് ഒഴുകിപ്പോകാതെ കെട്ടിക്കിടക്കുന്ന സ്ഥിതിയാണുള്ളത്.

കാപ്പിസെറ്റ് പയ്യമ്പള്ളി റോഡ് പണി തീരുന്നതോടുകൂടി പോലീസ് സ്റ്റേഷൻ ഭാഗത്തുനിന്നുള്ള വെള്ളം കൂടി ഒഴുകിയെത്തിയാൽ പുൽപ്പള്ളി ടൗൺ വെള്ളത്തിനടിയിലാകുന്ന അവസ്ഥയാണുള്ളത്. അതോടൊപ്പം ട്രാഫിക്ക് ജംഗ്ഷനിൽ നിന്നും കേവലം 50 മീറ്ററോളം മാത്രം ദൂരത്തിൽ റോഡ് പൂർണ്ണമായും തകർന്നിരിക്കുകയാണ്. റോഡിലെ ഗർത്തത്തിൽ വീണ് നിരവധി ചരക്ക് വാഹനങ്ങളും, ഓട്ടോറിക്ഷകളുമടക്കം  മറിയുകയും ചെയ്ത അവസ്ഥയുണ്ടായിട്ടുണ്ട്.മെയിൻ ടൗണിന്റെ ഭാഗമായ ഈ റോഡ് തകർന്നു തരിപ്പണമായത് പലവട്ടം അധികാരികളുടെ ശ്രദ്ധയിൽപ്പെടുത്തിയിട്ടും നന്നാക്കാൻ ശ്രമിക്കാത്തതിൽ പുൽപ്പള്ളിയിൽ ചേർന്ന മർച്ചന്റ്സ് അസോസിയേഷന്റെ പൊതുയോഗം ശക്തമായ പ്രതിഷേധം രേഖപ്പെടുത്തി.