ചിപ്പിലിത്തോട്-തളിപ്പുഴ, പൂഴിത്തോട്-പടിഞ്ഞാറത്തറ റോഡുകൾ ഉടൻ നിർമ്മിക്കണം: റോഡ് ആക്‌സിഡന്റ് ആക്ഷൻ ഫോറം

By ന്യൂസ് വയനാട് ബ്യൂറോ

മാനന്തവാടി:വയനാട് ജില്ലയിലെ ഗതാഗത പ്രശ്നങ്ങൾ ചർച്ച ചെയ്തുകൊണ്ട് ‘റോഡ് ആക്സിഡന്റ് ആക്ഷൻ ഫോറം’ (RAAF) ഒരു നിവേദനം സമർപ്പിച്ചു. താമരശ്ശേരി ചുരം റോഡിലെ ഗതാഗതക്കുരുക്ക് കാരണം വയനാട്ടിലെ ജനങ്ങൾ അനുഭവിക്കുന്ന യാത്രാദുരിതങ്ങൾക്കും അപകടങ്ങൾക്കും പരിഹാരം കാണണമെന്ന് നിവേദനത്തിൽ ആവശ്യപ്പെടുന്നു.

പുതിയ റോഡുകൾ ഉടൻ നിർമ്മിക്കണം: റാഫ്

കൽപ്പറ്റ: വയനാടിന്റെ യാത്രാദുരിതങ്ങൾക്ക് പരിഹാരം കാണാൻ ചിപ്പിലിത്തോട് – തളിപ്പുഴ, പൂഴിത്തോട് – പടിഞ്ഞാറത്തറ എന്നീ റോഡുകൾ അടിയന്തരമായി നിർമ്മിക്കണമെന്ന് റോഡ് ആക്സിഡന്റ് ആക്ഷൻ ഫോറം (RAAF) ആവശ്യപ്പെട്ടു. താമരശ്ശേരി ചുരത്തിലെ ഗതാഗതക്കുരുക്ക് കാരണം രോഗികളെ ആശുപത്രിയിൽ എത്തിക്കാൻ പോലും കഴിയാത്ത സാഹചര്യമാണെന്ന് ചൂണ്ടിക്കാട്ടി സംഘടന കേരള മുഖ്യമന്ത്രി, വയനാട്, കോഴിക്കോട് ജില്ലകളിലെ ജനപ്രതിനിധികൾ, ജില്ലാ ഭരണകൂടം എന്നിവർക്ക് നിവേദനം നൽകി.

വയനാട്ടിൽ മതിയായ ചികിത്സാ സൗകര്യങ്ങളോ മെഡിക്കൽ കോളേജോ ഇല്ലാത്തതിനാൽ ഗുരുതര രോഗികളെ കോഴിക്കോട് മെഡിക്കൽ കോളേജിലേക്ക് കൊണ്ടുപോകുന്നത് താമരശ്ശേരി ചുരം വഴിയാണ്. ഒന്നുമുതൽ ഒമ്പത് വരെ ഹെയർപിൻ വളവുകളുള്ള ഈ റോഡിലെ ഗതാഗതക്കുരുക്ക് കാരണം ആംബുലൻസുകൾ പോലും പലപ്പോഴും കുടുങ്ങിക്കിടക്കുന്നു. കാൽ നൂറ്റാണ്ടിലധികം പഴക്കമുള്ള ഈ റോഡ് കാലഹരണപ്പെട്ടതാണെന്നും, വർധിച്ച വാഹനങ്ങളുടെ ഭാരം താങ്ങാനാവാതെ റോഡിന്റെ സ്ഥിരത നഷ്ടപ്പെട്ടിരിക്കുന്നതായും നിവേദനത്തിൽ പറയുന്നു.

ഈ സാഹചര്യത്തിൽ, വയനാടിന്റെ വികസനത്തിന് റോഡ് വികസനം അനിവാര്യമാണ്. ഇതിന് അടിയന്തരമായി സർക്കാർ നടപടികൾ സ്വീകരിക്കണം. താഴെ പറയുന്ന റോഡുകൾ നിർമ്മിക്കുന്നതിലൂടെ ഗതാഗതക്കുരുക്ക് ഒരു പരിധിവരെ ഒഴിവാക്കാൻ സാധിക്കുമെന്നും RAAF ചൂണ്ടിക്കാട്ടി:

ചിപ്പിലിത്തോട് – മരുതിലാവ് – തളിപ്പുഴ ബൈപാസ് റോഡ്: ഏറ്റവും ചെലവ് കുറഞ്ഞതും പ്രയോജനകരവുമായ ഈ ബൈപാസ് റോഡ് കാലതാമസം കൂടാതെ നിർമ്മിച്ച് ഗതാഗതത്തിനായി തുറന്നു കൊടുക്കണം.

പടിഞ്ഞാറത്തറ – പൂഴിത്തോട് റോഡ്: ഈ റോഡ് തലപ്പുഴ – അമ്പായത്തോട് വഴി കണ്ണൂർ വിമാനത്താവളം വരെ വികസിപ്പിക്കണം.

ഈ രണ്ട് റോഡുകളും യാഥാർത്ഥ്യമായാൽ വയനാട്ടിലേക്കുള്ള യാത്രാദുരിതത്തിന് ഒരു പരിഹാരമാകും. ഇതിനായി ഭൂമി ഏറ്റെടുക്കൽ, വനം വകുപ്പ് അനുമതി തുടങ്ങിയ കാര്യങ്ങളിൽ വേഗത്തിൽ തീരുമാനമെടുക്കാൻ വയനാട്ടിൽ നിന്നുള്ള ജനപ്രതിനിധികൾ സർക്കാരിൽ സമ്മർദ്ദം ചെലുത്തണം. കൂടാതെ, പരിസ്ഥിതി അനുമതിക്കായി കേന്ദ്ര സർക്കാരിന്റെ അനുമതിയും എംപിമാർ വഴി നേടിയെടുക്കണമെന്നും നിവേദനത്തിൽ ആവശ്യപ്പെടുന്നു.

ഗതാഗതക്കുരുക്ക് ഒഴിവാക്കാനും റോഡപകടങ്ങൾ കുറയ്ക്കാനും പൊതുജന സംഘടനകളുമായി ചേർന്ന് പ്രവർത്തിക്കാൻ റോഡ് ആക്സിഡന്റ് ആക്ഷൻ ഫോറം തയ്യാറാണെന്ന് വയനാട് ജില്ലാ പ്രസിഡന്റ് മുഹമ്മദ് ഫാരിസും ജനറൽ സെക്രട്ടറി സജി മണ്ഡലത്തിൽ അറിയിച്ചു.