വയോജന പീഡനത്തിനെതിരെ ബോധവത്കരണ ക്ലാസ് സംഘടിപ്പിച്ചു

By ന്യൂസ് വയനാട് ബ്യൂറോ

പുൽപ്പള്ളി: വയോജനങ്ങൾ നേരിടുന്ന വിവിധ തരത്തിലുള്ള പീഡനങ്ങളും അവകാശലംഘനങ്ങളും സംബന്ധിച്ച് അവബോധം സൃഷ്ടിക്കുന്നതിനായി പഴശ്ശിരാജാ കോളേജിൽ വയോജന പീഡനത്തിനെതിരെ ബോധവത്കരണ ക്ലാസ് സംഘടിപ്പിച്ചു. പഴശ്ശിരാജാ കോളേജ് എൻ എസ് എസ് യൂണിറ്റിന്റെയും വയനാട് സാമൂഹ്യനീതി വകുപ്പിന്റെയും സംയുക്താഭിമുഖ്യത്തിൽ സംഘടിപ്പിച്ച പരിപാടിയിൽ മാനന്തവാടി കമ്മ്യൂണിറ്റി റേഡിയോ മാറ്റൊലി സ്റ്റേഷൻ ഡയറക്ടറും ന്യൂമൻസ് കോളേജ് മാനേജരുമായ ഫാ. ബിജോ തോമസ് ബോധവത്കരണ ക്ലാസിന് നേതൃത്വം നൽകി. വയോജന പീഡനത്തിന്റെ വിവിധ രൂപങ്ങൾ, വയോജനങ്ങളുടെ അവകാശങ്ങൾ, സംരക്ഷണ സംവിധാനങ്ങൾ, സമൂഹത്തിന്റെ ഉത്തരവാദിത്തം എന്നിവയെക്കുറിച്ച് അദ്ദേഹം ക്ലാസിൽ വിശദീകരിച്ചു.

വിദ്യാർഥികളിലും യുവജനങ്ങളിലും വയോജനങ്ങളോടുള്ള കരുതലും ബഹുമാനവും വളർത്തുന്നതിനും വയോജന പീഡനം തടയുന്നതിൽ സമൂഹത്തിന്റെ പങ്കാളിത്തം ഉറപ്പാക്കുന്നതിനും ലക്ഷ്യമിട്ടാണ് പരിപാടി സംഘടിപ്പിച്ചത്. എൻ എസ് എസ് പ്രോഗ്രാം ഓഫീസർമാരായ വിമ്യ കെ. പി., ഡോ. സന്തോഷ് എന്നിവർ പരിപാടിയുടെ ഏകോപനം നിർവഹിച്ച ചടങ്ങിൽ എൻ എസ് എസ് വളണ്ടിയർമാരും വിദ്യാർഥികളും അധ്യാപകരും പങ്കെടുത്തു. വയോജനങ്ങളെ സംരക്ഷിക്കുകയും അവരുടെ അന്തസ്സും അവകാശങ്ങളും ഉറപ്പാക്കുകയും ചെയ്യേണ്ടത് ഓരോ പൗരന്റെയും സാമൂഹിക ഉത്തരവാദിത്തമാണെന്ന സന്ദേശമാണ് ഈ പരിപാടി മുന്നോട്ടുവെച്ചത്.