ശ്രുതിക്ക് വീട് നൽകുമെന്ന് പറഞ്ഞ് ടി. സിദ്ദിഖ് വഞ്ചിച്ചെന്ന് സി.പി.ഐ.എം; ആരോപണം തള്ളി ടി. സിദ്ദിഖ്

By ന്യൂസ് വയനാട് ബ്യൂറോ

കൽപ്പറ്റ: വയനാട് ചൂരൽമല ദുരന്തബാധിതയായ ശ്രുതിയെ വീട് വാഗ്ദാനം ചെയ്ത് ടി. സിദ്ദിഖ് എം.എൽ.എ വഞ്ചിച്ചതായി സി.പി.ഐ.എം വയനാട് ജില്ലാ സെക്രട്ടറി കെ. റഫീഖ് ആരോപിച്ചു. 120 ദിവസത്തിനുള്ളിൽ വീട് നിർമ്മിച്ച് നൽകുമെന്ന് സിദ്ദിഖ് ഉറപ്പുനൽകിയതായും ഇത് വിശ്വസിച്ച് ശ്രുതി സർക്കാർ ടൗൺഷിപ്പിലെ വീട് വേണ്ടെന്ന് വെച്ച് 15 ലക്ഷം രൂപ വാങ്ങിയെന്നും അദ്ദേഹം പറഞ്ഞു. എന്നാൽ വീട് ലഭിക്കാത്തതിനെ തുടർന്ന് 15 ലക്ഷം രൂപ തിരികെ നൽകാമെന്നും ടൗൺഷിപ്പിൽ വീട് വേണമെന്നും ആവശ്യപ്പെട്ട് ശ്രുതി വീണ്ടും സർക്കാരിന് അപേക്ഷ നൽകിയിരിക്കുകയാണെന്നും റഫീഖ് ആരോപിച്ചു. കെ.പി.സി.സി ആപ്പ് വഴിയുള്ള ഫണ്ട് ശേഖരണത്തിലും വീട് നിർമ്മാണത്തിലും കോൺഗ്രസ് രാഷ്ട്രീയ മുതലെടുപ്പ് നടത്തുകയാണെന്നും അദ്ദേഹം കുറ്റപ്പെടുത്തി.

എന്നാൽ ഈ ആരോപണങ്ങൾ പച്ചക്കള്ളമാണെന്ന് ടി. സിദ്ദിഖ് എം.എൽ.എ പ്രതികരിച്ചു. ശ്രുതിക്ക് വീട് നൽകുമെന്ന് താൻ ഒരിടത്തും വാഗ്ദാനം ചെയ്തിട്ടില്ലെന്നും വീട് സ്പോൺസർ ചെയ്തവർക്ക് അഭിനന്ദനം അറിയിച്ച് താൻ ഇട്ട ഫേസ്ബുക്ക് പോസ്റ്റ് എഡിറ്റ് ചെയ്ത് വ്യാജമായി പ്രചരിപ്പിക്കുകയാണെന്നും അദ്ദേഹം പറഞ്ഞു. തറക്കല്ലിടൽ ചടങ്ങിൽ പങ്കെടുത്തതിനെ തെറ്റായി വ്യാഖ്യാനിച്ച് സി.പി.ഐ.എം ജില്ലാ സെക്രട്ടറി ബോധപൂർവം കള്ളം പ്രചരിപ്പിക്കുകയാണെന്നും സിദ്ദിഖ് വ്യക്തമാക്കി. ഇതിന് തെളിവായി തന്റെ യഥാർത്ഥ ഫേസ്ബുക്ക് പോസ്റ്റും അദ്ദേഹം പുറത്തുവിട്ടു.