ലഹരിക്കെതിരെ കാവലാളായി ‘ചലഞ്ചേഴ്സ് ക്ലബ്ബ്’; പനമരം ജി.എച്ച്.എസ്.എസിൽ വിദ്യാർത്ഥി ജാഗ്രതാ സേന രൂപീകരിച്ചു

By ന്യൂസ് വയനാട് ബ്യൂറോ

പനമരം: കാമ്പസും പരിസരവും ലഹരിമുക്തമാക്കുക എന്ന ലക്ഷ്യത്തോടെ പനമരം ഗവ. ഹയർസെക്കൻഡറി സ്കൂളിൽ വിദ്യാർത്ഥി ജാഗ്രതാ സേനയ്ക്ക് രൂപം നൽകി. സ്കൂളിലെ ‘ചലഞ്ചേഴ്സ് ക്ലബ്ബിന്റെ’ ആഭിമുഖ്യത്തിൽ നടത്തിയ ലഹരിവിരുദ്ധ ക്വിസ് മത്സരത്തിലൂടെ തിരഞ്ഞെടുത്ത 30 മിടുക്കരായ വിദ്യാർത്ഥികളാണ് ഈ പ്രത്യേക പ്രതിരോധ സേനയിലെ അംഗങ്ങൾ. സ്കൂളിലോ പരിസരങ്ങളിലോ വീടുകളിലോ ലഹരിയുമായി ബന്ധപ്പെട്ട എന്തെങ്കിലും കാര്യങ്ങൾ ശ്രദ്ധയിൽപ്പെട്ടാൽ ഉടനടി അധികാരികളെ അറിയിക്കാനും കൃത്യമായ പരിഹാരം കാണാനും ഈ കുട്ടിക്കൂട്ടായ്മ മുന്നിൽ നിൽക്കും. സ്കൂൾ കോമ്പൗണ്ടിൽ നടന്ന ചടങ്ങിൽ എച്ച്.എം. ഷീജ ജെയിംസ് ടീച്ചർ സേനയുടെ ഔദ്യോഗിക പ്രഖ്യാപനം നിർവ്വഹിച്ചു. ചലഞ്ചേഴ്സ് ക്ലബ്ബ് ഭാരവാഹികളായ മുഹമ്മദ് നവാസ് ടി.ഇ, രേഖ കെ എന്നിവരും മറ്റ് അധ്യാപകരും വിദ്യാർത്ഥികളും ചടങ്ങിൽ പങ്കെടുത്തു.