പെൻഷൻ പരിഷ്കരണം നിഷേധിച്ചതിലും മെഡിസെപ്പിലെ അപാകതകളിലും പ്രതിഷേധിച്ച് കെ.എസ്.എസ്.പി.എ.യുടെ കരിദിനാചരണം

By ന്യൂസ് വയനാട് ബ്യൂറോ

കൽപ്പറ്റ: കേരളത്തിലെ പെൻഷൻകാർക്ക് അർഹതപ്പെട്ട പെൻഷൻ പരിഷ്കരണവും ക്ഷാമാശ്വാസവും നിഷേധിക്കുന്നതിലും, ആരോഗ്യ ഇൻഷുറൻസ് പദ്ധതിയായ മെഡിസെപ്പിലെ അപാകതകൾ പരിഹരിക്കാത്തതിലും പ്രതിഷേധിച്ച് കേരള സ്റ്റേറ്റ് സർവീസ് പെൻഷനേഴ്‌സ് അസോസിയേഷൻ (കെ.എസ്.എസ്.പി.എ) വയനാട് ജില്ലാ ട്രഷറിക്കു മുന്നിൽ കരിദിനം ആചരിച്ചു. കൽപ്പറ്റ നിയോജക മണ്ഡലം കമ്മിറ്റിയുടെ നേതൃത്വത്തിൽ നടത്തിയ ധർണ്ണയും വിശദീകരണ യോഗവും ശ്രദ്ധേയമായി.

2024 ജൂലൈ 1 മുതൽ ലഭിക്കേണ്ട പെൻഷൻ പരിഷ്കരണവും 2022 മുതൽ ലഭിക്കേണ്ട ക്ഷാമാശ്വാസവും സർക്കാർ നിഷേധിച്ചത് പെൻഷൻകാരുടെ ജീവിതം ദുസ്സഹമാക്കിയെന്ന് പ്രതിഷേധക്കാർ ചൂണ്ടിക്കാട്ടി. കൂടാതെ, സംസ്ഥാനത്തെ പെൻഷൻകാരുടെ ആരോഗ്യ ഇൻഷുറൻസ് പദ്ധതിയായ മെഡിസെപ്പിൽ നിലവിലുള്ള അപാകതകൾ പരിഹരിച്ച് കൂടുതൽ ആശുപത്രികളെയും രോഗങ്ങളെയും ഉൾപ്പെടുത്താത്തതിലും യോഗം ശക്തമായ പ്രതിഷേധം രേഖപ്പെടുത്തി.

കെ.എസ്.എസ്.പി.എ സംസ്ഥാന കമ്മിറ്റി അംഗം വേണുഗോപാൽ എം. കീഴ്ശ്ശേരി ധർണ്ണ ഉദ്ഘാടനം ചെയ്തു. നിയോജകമണ്ഡലം വൈസ് പ്രസിഡന്റ് അബു ഏലിയാസ് അധ്യക്ഷത വഹിച്ച യോഗത്തിൽ സെക്രട്ടറി കെ. സുരേന്ദ്രൻ സ്വാഗതം പറഞ്ഞു. സംസ്ഥാന വനിതാ കമ്മിറ്റി അംഗം ജി. വിജയമ്മ, സി. ജോസഫ്, കെ. ശശികുമാർ, ടി.കെ. സുരേഷ്, വി. രാമനുണ്ണി, പി.എ. ജോസ്, രമേശൻ മാണിക്യൻ, കെ. സുബ്രഹ്മണ്യൻ, എം. വത്സല, ടി. സതീഷ് കുമാർ തുടങ്ങിയവർ ധർണ്ണയെ അഭിസംബോധന ചെയ്ത് സംസാരിച്ചു. പെൻഷൻകാരുടെ ന്യായമായ ആവശ്യങ്ങൾ അംഗീകരിക്കുന്നത് വരെ പ്രക്ഷോഭങ്ങൾ തുടരുമെന്ന് നേതാക്കൾ അറിയിച്ചു.