Newswayanad.in

By ന്യൂസ് വയനാട് ബ്യൂറോ

മുത്തങ്ങ : ഇന്ന് രാവിലെ മുത്തങ്ങ എക്സൈസ് ചെക്ക് പോസ്റ്റിൽ നടത്തിയ വാഹന പരിശോധനയിൽ ബാംഗ്ലൂരിൽ നിന്നും വന്ന കെ.എസ്.ആർ.ടി.സി ബസിലെ യാത്രക്കാരനായ അജ്മൽ (26) നെ 14.600 ഗ്രാം മെത്താംഫിറ്റമിനുമായി എക്സൈസ് ഇൻസ്പെക്ടർ ജി.എം. മനോജ്കുമാറും സംഗവും അറസ്റ്റു ചെയ്തു. മലപ്പുറം ജില്ലക്കാരനായ ഇയാൾ കേരളത്തിലെ മയക്കുമരുന്ന് മാഫിയക്ക് മയക്കുമരുന്ന് എത്തിച്ചു കൊടുക്കുന്ന പ്രധാന കണ്ണിയാണ് പിടിയിലായ ആളെന്നും, ഇയ്യാൾ ഇതിനു മുമ്പും പലതവണകളായി മയക്കുമരുന്ന് കടത്തിയിട്ടുണ്ടെന്നുമാണ് എക്സൈസ് ഉദ്യോഗസ്ഥർക്ക് ലഭിച്ച വിവരം. പരിശോധനയിൽ പ്രിവൻ്റീവ് ഓഫിസർമാരായ എം.എ രഘു, എ.ടി.കെ.രാമചന്ദ്രൻ, സിവിൽ എക്സൈസ് ഓഫീസർമാരായ ബാബു.ആർ.സി, എം.സുരേഷ് എന്നിവർ പങ്കെടുത്തു.

ലോകസഭാ തെരഞ്ഞെടുപ്പിന്റെ ഭാഗമായി ജില്ലയില്‍ എക്‌സൈസ് വകുപ്പിന്റെ നേതൃത്വത്തില്‍ 22.02.2024 മുതൽ ആരംഭിച്ച സ്‌പെഷ്യല്‍ ഡ്രൈവില്‍ വയനാട് ഡിവിഷനിൽ ഇതുവരെ 587 റെയിഡുകൾ നടത്തിയതിൽ 54 അബ്കാരി കേസുകൾ, 33 എന്‍.ഡി.പി.എസ് കേസുകള്‍, 187 കോട്പ കേസുകൾ എന്നിവ കണ്ടെത്തിയതായി ഡെപ്യൂട്ടി എക്‌സൈസ് കമ്മീഷണര്‍ എം. രാകേഷ് അറിയിച്ചു. ഇതില്‍ 179.5 ലിറ്റര്‍ ഇന്ത്യന്‍ നിര്‍മ്മിത വിദേശമദ്യം, 20 ലിറ്റര്‍ ചാരായം, 14.53 ലിറ്റർ നിറം കലർത്തിയ മദ്യം,437 ലിറ്റര്‍ വാഷ്, , 8.45 ലിറ്റര്‍ ബിയര്‍, 6.3 ലിറ്റർ അന്യസംസ്ഥാന മദ്യം 1.565 കിലോ കഞ്ചാവ്, 3605.350 കിലോ പുകയില ഉത്പ്പന്നങ്ങള്‍, 3വാഹനങ്ങൾ,

1600 ഗ്രാം സ്വർണ്ണം എന്നിവ പിടികൂടി. കോട്പ ഫൈൻ ഇനത്തിൽ 37,200/-രൂപ പിഴയും ഈടാക്കി. അബ്ക്കാരി കേസുകളിൽ 42 പ്രതികളെയും, എൻ.ഡി.പി.എസ് കേസിൽ 34 പ്രതികളെയും അറസ്റ്റ് ചെയ്തു. സ്പെഷ്യൽ ഡ്രൈവിൽ ഇതുവരെ 13,571 വാഹനങ്ങൾ പരിശോധിച്ചിട്ടുണ്ട്.

അയൽ സംസ്ഥാന പോലീസ് എക്സൈസ് സേന വകുപ്പുകൾ ഉൾപ്പെടെ, കേരള പോലീസ് ,ഫോറസ്റ്റ്, റവന്യു, ജി.എസ്.ടി വകുപ്പുകളുമായി ചേർന്ന് 36 സംയുക്ത പരിശോധനകൾ നടത്തിയിട്ടുണ്ട്.

വിദേശമദ്യഷാപ്പുകൾ, ബാറുകൾ , കള്ള് ഷാപ്പുകൾ എന്നിവിടങ്ങളിൽ പരിശോധനയും നടത്തി വരുന്നു.

വ്യാജവാറ്റ്, സ്പിരിറ്റ് കടത്ത്, വ്യാജ മദ്യം, ചാരായം നിര്‍മാണം, സ്പിരിറ്റ് ചാരായമായും നിറം കലര്‍ത്തി വിദേശമദ്യമായും ഉപയോഗിക്കല്‍, കള്ളിന്റെ വീര്യവും , അളവും കൂട്ടാനുള്ള മായം ചേര്‍ക്കലുകള്‍ എന്നീ പ്രവര്‍ത്തനങ്ങള്‍ തടയുന്നതിന് ഫെബ്രുവരി 23 മുതലാണ് സ്‌പെഷ്യല്‍ എന്‍ഫോഴ്‌സ്മെന്റ് ഡ്രൈവ് തുടങ്ങിയത്. ഈ കാലയളവില്‍ വ്യാജമദ്യവും, ലഹരിമരുന്നുകളും, മറ്റ് സംസ്ഥാനങ്ങളില്‍ നിന്നുള്ള മദ്യവും കേരളത്തിലേക്ക് എത്തുന്നതിന് സാധ്യത കൂടുതലായതിനാല്‍ വാഹന പരിശോധനയും കര്‍ശനമാക്കിയിട്ടുണ്ട്. എക്‌സൈസ് ചെക്ക്‌പോസ്റ്റ് വഴി കടന്നുവരുന്ന പച്ചക്കറി, മത്സ്യം എന്നിവ കയറ്റിവരുന്ന വാഹനങ്ങള്‍, ചരക്ക് ഇല്ലാതെ വരുന്ന വാണിജ്യ വാഹനങ്ങള്‍, ടാങ്കര്‍ ലോറി തുടങ്ങിയവ പ്രത്യേകം പരിശോധനയ്ക്ക് വിധേയമാക്കുന്നുണ്ട്. ആദിവാസി കോളനികള്‍ കേന്ദ്രീകരിച്ചും പരിശോധന ഊര്‍ജിതമാണ്.

സ്‌പെഷ്യല്‍ ഡ്രൈവ് കാലയളവില്‍ 24 മണിക്കൂറും പ്രവര്‍ത്തിക്കുന്ന ഒരു ജില്ലാതല എക്‌സൈസ് കണ്‍ട്രോള്‍ റൂം വയനാട് ഡിവിഷന്‍ ഓഫീസില്‍ പ്രവര്‍ത്തിക്കുന്നുണ്ട്. കണ്‍ട്രോള്‍ റൂം ടെലഫോണ്‍ നമ്പര്‍- 04936- 288215. ജില്ലയില്‍ എക്‌സൈസ് സര്‍ക്കിള്‍ ഓഫീസുകള്‍ കേന്ദ്രീകരിച്ച് താലൂക്ക് തലത്തില്‍ എസൈസ് സർക്കിൾ ഇന്‍സ്‌പെക്ടറുടെ നേതൃത്വത്തില്‍ സ്‌ട്രൈക്കിങ് ഫോഴ്‌സും, ഹൈവേകളില്‍ 24 മണിക്കൂറും പട്രോളിങ് ടീമും പ്രവര്‍ത്തിക്കുന്നുണ്ട്.ഇതര സംസ്ഥാന തൊഴിലാളികളുടെ താമസസ്ഥലങ്ങളിലും ലേബര്‍ ക്യാമ്പുകളിലും ശക്തമായ പരിശോധന നടത്തുന്നുണ്ട്. പോലീസുമായി ചേര്‍ന്ന് സംയുക്ത പരിശോധനയും നടക്കുന്നു. വനപ്രദേശങ്ങളില്‍ ഫോറസ്റ്റ് വകുപ്പുമായി സഹകരിച്ചും സംയുക്ത പരിശോധന തുടരും.

അബ്കാരി, എന്‍.ഡി.പി.എസ് കേസുകളില്‍ ഉള്‍പ്പെട്ട മുന്‍കുറ്റവാളികള്‍, ഇവരുടെ താമസം, പ്രവര്‍ത്തനങ്ങള്‍ സംബന്ധിച്ചും ഉദ്യോഗസ്ഥരുടെ നേതൃത്വത്തില്‍ അന്വേഷണം പുരോഗമിക്കുന്നു. പൊതുജനങ്ങൾക്ക് പരാതി അറിയിക്കുന്നതിനായി എക്സൈസ് സർക്കിൾ ഇൻസ്പെക്ടർമാരുടെ ഫോൺ നമ്പർ ചുവടെ ചേർക്കുന്നു.