വൈൽഡ് വിസ്‌പേഴ്‌സ് ചിത്രകലാ പ്രദർശനം തുടങ്ങി

മാനന്തവാടി: വൈൽഡ് വിസ്‌പേഴ്‌സ് ചിത്രകലാ പ്രദർശനം പ്രശസ്ത ചിത്രകാരനും ക്യുറേറ്ററും കൊച്ചി മുസിരിസ് ബിനാലെ ആർട്ടിസ്റ്റിക് ഡയറക്ടറുമായ ബോസ് കൃഷ്ണമാചാരി ഉദ്ഘാടനം ചെയ്തു.

വയനാട് ആർട്ട് ക്ലൗഡിൻ്റെ ആഭിമുഖ്യത്തിൽ ഉറവ് ഇക്കോ ലിങ്ക്‌സിൻ്റെ സഹകരണത്തോടെ 20 കലാകാരന്മാരുടെ സൃഷ്ടികൾ ഉൾക്കൊള്ളുന്ന കലാപ്രദർശനമാണ് “വൈൽഡ് വിസ്‌പേഴ്‌സ്”. മാനന്തവാടി ലളിതകലാ അക്കാദമി ആർട്ട് ഗാലറിയിൽ 2024 ഡിസംബർ 27 മുതൽ 30 വരെയാണ് പ്രദർശനം. വയനാടിൻ്റെ വർത്തമാനകാല ദുരന്ത പശ്ചാത്തലത്തിൽ കലാകാരന്മാരുടെ നിമന്ത്രണങ്ങളാണ് വൈൽഡ് വിസ്പേഴ്സ് എന്ന ഈ കലാപ്രദർശനം.

പങ്കെടുക്കുന്ന കലാകാരന്മാർ:

അരുണ നാരായണൻ ആലഞ്ചേരി, ബിനീഷ് നാരായണൻ, ചിത്ര എലിസബത്ത്, ദീപ കെ പി, ജോർജ്കുട്ടി, ജയേഷ് കെ കെ, ജിതിൻ ടി ജോയ്, ജോസഫ് എം വർഗീസ്, ഞാണൻ, പ്രസീത ബിജു, രാജേഷ് അഞ്ചിലൻ, രമേഷ് എം ആർ, സദാനന്ദൻ ഇ സി, ഷമ്മി എൻ, സുധീഷ് പല്ലിശേരി, സണ്ണി മാനന്തവാടി, സുരേഷ് കെ.ബി, ഉമേഷ് എ.സി, വിജിനി ഡൊമിനിക്, വിനോദ് കുമാർ.

കലാകാരന്മാരെയും ഡിസൈനർമാരെയും കമ്മ്യൂണിറ്റികളെയും തമ്മിലിണക്കിയുള്ള സഹകരണവും കൈമാറ്റവുമാണ് വയനാട് ആർട് ക്ലൗഡ് നിർവഹിക്കുന്നത്. ഇന്ത്യയിൽ നിന്നും സ്വിറ്റ്‌സർലൻഡിൽ നിന്നുമുള്ള സർഗാത്മകരായ ഒരു സഹകരണ സംഘമാണ് WAC നിയന്ത്രിക്കുന്നത്. ഉറവ് ഇക്കോ ലിങ്ക്‌സുമായി സഹകരിച്ച് ഡബ്ല്യുഎസിയുടെ മൂന്നാമത്തെ പ്രദർശനമാണ് വൈൽഡ് വിസ്പേഴ്സ്. 2023ൽ മാനന്തവാടിയിലെ ലളിതകലാ അക്കാദമി ആർട്ട് ഗ്യാലറിയിലും തൃക്കൈപ്പറ്റയിലെ ഉറവ് ബാംബൂ ഗ്രോവ് റിസോർട്ടിലുമാണ് ‘ഡ്രീംസ് ബിയോണ്ട് ദ ഫോറസ്റ്റ്’ എന്ന മുൻ പ്രദർശനങ്ങൾ നടന്നത്.