വയനാട് ജില്ലയിലെ മനുഷ്യ വന്യജീവി സംഘർഷം: അവലോകന യോഗം ചേർന്നു

ബത്തേരി :വയനാട് ജില്ലയിലെ മനുഷ്യ വന്യജീവി സംഘർഷം സംബന്ധിച്ച് കേരള ചീഫ് വൈൽഡ് ലൈഫ് വാർഡൻ പ്രമോദ്.ജി. കൃഷ്‌ണൻ സുൽത്താൻ ബത്തേരിയിൽ ജില്ലയിലെ വനംവകുപ്പുദ്യോഗസ്ഥരുമായി യോഗം ചേർന്ന് അവലോകനം ചെയ്‌തു. ജില്ലയിലെ നോർത്ത് വയനാട്, സൗത്ത് വയനാട്, വയനാട് വെൽഡ് ലൈഫ് എന്നീ മൂന്ന് വനം ഡിവിഷനിലെ ഉന്നത ഉദ്യോഗസ്ഥർ, ഫീൽഡ്‌തല ഉദ്യോഗസ്ഥർ എന്നിവരുമായി സുൽത്താൻ ബത്തേരി ഗജ ഫോറസ്റ്റ് ഐ.ബി കോൺഫറൻസ് ഹാളിൽ വച്ച് യോഗം ചേർന്ന് വയനാട് ജില്ലിയിലെ വിവിധ സ്ഥലങ്ങളിലെ വന്യജീവി പ്രശ്‌നങ്ങൾ ചർച്ച ചെയ്യുകയും സ്ഥിതിഗതികൾ വിലിയിരുത്തുകയും ചെയ്തു. തുടർന്ന് മിഷൻ ഫെൻസിംഗ് എന്ന പദ്ധതി വിഭാവനം ചെയ്‌ത്‌ ജില്ലയിലെ വനാതിർത്തികളിൽ സ്ഥാപിച്ചിട്ടുള്ള സോളാർ ഫെൻസിംഗ് പ്രതിരോധ സംവിധാനങ്ങളുടെ പ്രവർത്തനം കാര്യക്ഷമമാക്കുന്നതിന് നിർദ്ദേശം നൽകി. ഇതു പ്രകാരം ഓരോ വനം റെയിഞ്ചിലും ടൂൾ റൂം കേന്ദ്രീകരിച്ച് ഫെൻസിംഗ് റിപ്പയർ സാമഗ്രികൾ ലഭ്യമാക്കി. ആവശ്യം വരുന്ന സന്ദർഭങ്ങളിൽ ഉപയോഗിക്കുന്ന വിധത്തിലുള്ള മോബൈൽ മെറ്റീരിയൽ സംവിധാനം ഏർപ്പെടത്തുന്നതിന് നിർദ്ദേശം നൽകി.

പുതിയതായി സ്ഥാപിക്കാനുദ്ദേശിക്കുന്ന ഹാങ്ങിംഗ് ഫെൻസിംഗ് തുടങ്ങിയ പ്രവർത്തികൾ സമയബന്ധിതമായി പൂർത്തിയാക്കുമെന്നും അറിയിച്ചു. ജനവാസമേഖലകളിൽ കടുവപോലുള്ള വന്യജീവികൾ ഇറങ്ങുന്ന അവസ്ഥയിൽ ഉണ്ടാകുന്ന അപകട സാധ്യതകൾ പരിശോധിച്ച് വിശദമായ ടെക്‌നിക്കൽ കമ്മിറ്റി റിപ്പോർട്ട് തയ്യാറാക്കണമെന്നും നിർദ്ദേശിച്ചു.

കൂടുതൽ പ്രശ്ന‌ങ്ങൾ സൃഷ്ട‌ിക്കുന്ന കാട്ടാനകളെ റേഡിയോ കോളർ ഘടിപ്പിച്ച് നിരീക്ഷിക്കുന്നതിന് നടപടിയെടുക്കുമെന്നും അറിയിച്ചു. വയർലെസ് സംവിധാനം കാര്യക്ഷമമാക്കുന്നതിനും, അവശ്യമെങ്കിൽ മുത്തങ്ങയിലെ കുങ്കി ആനകളുടെ സേവനം ലഭ്യക്കുന്നതിനും, ജനവാസകേന്ദങ്ങളിലെക്കുള്ള റോഡുകളുടെ വശങ്ങളിലെ അടിക്കാടുകൾ വെട്ടുന്ന പ്രവർത്തികൾ ലഭ്യമായ വനംവകുപ്പ് ഫണ്ട് ഉപയോഗിച്ച് ചെയ്യുന്നതിനും, എം.എൻ.ആർ.ഇ.ജി.എ പദ്ധതിയിൽ ഉൾപ്പെടുത്തി ചെയ്യുന്നത് സംബന്ധിച്ചും നിർദ്ദേശം നൽകി. വയനാട് ജില്ലയിലെ വനത്തിനകത്തുള്ള വയലുകളുടെ പരിപാലനം ചെയ്യുന്നതിനും, ജലാശയങ്ങളിലെ ജല ലഭ്യത ഉറപ്പുവരുത്തിയും വന്യജീവികൾക്ക് ഭക്ഷണ കുടിവെള്ള ലഭ്യത ഉറപ്പുവരുത്തുന്നതിന് വിഭാവനം ചെയ്‌ത പദ്ധതി ഈ സാമ്പത്തിക വർഷം തന്നെ പൂർത്തിയാക്കുന്നതിനും നിർദ്ദേശിച്ചു. താൽക്കാലിക ജീവനക്കാർക്കുള്ള വേതനം താമസം കൂടാതെ വിതരണം ചെയ്യുന്നതിനും നർദ്ദേശിച്ചു. കുരങ്ങു ശല്യം കുറക്കുന്നത് സംബന്ധിച്ച് വിശദമായ പ്ളാൻ തയ്യാറാക്കി സർക്കാരിന്റെ അനുമതിക്ക് സമർപ്പിക്കുമെന്നും ചീഫ് വൈൽഡ് ലൈഫ് വാർഡൻ പറഞ്ഞു. യോഗത്തിൽ നോർത്തേൺ സർക്കിൾ കണ്ണൂർ ചീഫ് ഫോറസ്‌ററ് കൺസർവേറ്റർ കെ.എസ് ദീപ, വയനാട് വൈൽഡ് ലൈഫ് വാർഡൻ വരുൺ ഡാലിയ, നോർത്ത് വയനാട് ഡി.എഫ്.ഒ മാർട്ടിൻ ലോവൽ, സൌത്ത് വയനാട് ഡി.എഫ്.ഒ അജിത്ത്.കെ. രാമൻ, ചീഫ് ഫോറസ്റ്‌ത് വെറ്ററിനറി ഓഫീസർ ഡോ. അരുൺ സക്കറിയ, ഡോ. അജേഷ് മോഹൻദാസ് എന്നിവരും വയനാട് ജില്ലയിലെ റെയിഞ്ച് ഫോറസ്റ്സ് ഓഫീസർമാരും, ഫീൽഡ് തല ഉദ്യോഅ്ഗസ്ഥരും പങ്കെടുത്തു.