തൊഴിലുറപ്പ് പദ്ധതി സംരക്ഷിക്കാൻ പൊഴുതനയിൽ പോസ്റ്റ് ഓഫീസ് മാർച്ച് നടത്തി

By ന്യൂസ് വയനാട് ബ്യൂറോ

പൊഴുതന: തൊഴിലുറപ്പ് പദ്ധതിയെ തകർക്കുന്ന കേന്ദ്ര സർക്കാർ നയങ്ങൾക്കെതിരെ എൻആർഇജി വർക്കേഴ്സ് യൂണിയൻ പൊഴുതന പഞ്ചായത്ത് കമ്മിറ്റിയുടെ നേതൃത്വത്തിൽ പൊഴുതനയിൽ പോസ്റ്റ് ഓഫീസ് മാർച്ച് സംഘടിപ്പിച്ചു. കേന്ദ്ര സർക്കാർ തൊഴിലുറപ്പ് പദ്ധതിക്ക് നൽകുന്ന പ്രാധാന്യം കുറയ്ക്കുകയും ഫണ്ട് വെട്ടിക്കുറയ്ക്കുകയും ചെയ്യുന്നതിനെതിരെ ശക്തമായ പ്രതിഷേധമാണ് മാർച്ചിൽ ഉടനീളം ഉയർന്നത്.

ഏരിയ സെക്രട്ടറി എൻ.സി. പ്രസാദ് മാർച്ച് ഉദ്ഘാടനം ചെയ്തു. കെ. ജെറീഷ് അധ്യക്ഷത വഹിച്ചു. തൊഴിലുറപ്പ് തൊഴിലാളികളുടെ അവകാശങ്ങൾ സംരക്ഷിക്കപ്പെടേണ്ടതിന്റെ ആവശ്യകത അദ്ദേഹം ഊന്നിപ്പറഞ്ഞു.

സിഐടിയു ജില്ലാ സെക്രട്ടറി എം. സെയ്ദ്, സിഐടിയു ജില്ലാ വൈസ് പ്രസിഡന്റ് സി.എച്ച്. മമ്മി, പഞ്ചായത്ത് പ്രസിഡന്റ് അനസ് റോസ്ന സ്റ്റെഫി, വൈസ് പ്രസിഡന്റ് കെ.വി. ബാബു, ഡിവൈഎഫ്ഐ ജില്ലാ കമ്മിറ്റി അംഗം സി.എച്ച്. ആഷിഖ്, കർഷക സംഘം ഏരിയ സെക്രട്ടറി എ. ഗഫൂർ, കർഷക തൊഴിലാളി യൂണിയൻ ഏരിയ കമ്മിറ്റി അംഗം സി. മമ്മി, മഹിളാ അസോസിയേഷൻ ഏരിയ സെക്രട്ടറി ടി.കെ. ഷാഹിന എന്നിവർ മാർച്ചിൽ സംസാരിച്ചു. തൊഴിലുറപ്പ് പദ്ധതിയുടെ പ്രാധാന്യം, കേന്ദ്രസർക്കാർ നയങ്ങൾ വരുത്തുന്ന ദോഷങ്ങൾ, തൊഴിലാളികൾ നേരിടുന്ന വെല്ലുവിളികൾ എന്നിവയെക്കുറിച്ച് നേതാക്കൾ വിശദീകരിച്ചു.

വി. വിനോദ് സ്വാഗതവും എൻആർഇജി പഞ്ചായത്ത് സെക്രട്ടറി സാദിക്കലി ടി.കെ. നന്ദിയും പറഞ്ഞു. കേന്ദ്ര സർക്കാരിന്റെ തൊഴിലാളി വിരുദ്ധ നയങ്ങൾക്കെതിരെ ശക്തമായ പ്രക്ഷോഭങ്ങൾ തുടരുമെന്ന് യൂണിയൻ ഭാരവാഹികൾ അറിയിച്ചു.