വോട്ടവകാശവും പൗരാവകാശങ്ങളും കവർന്നെടുക്കാൻ ശ്രമം: ബത്തേരിയിൽ യൂത്ത് കോൺഗ്രസ് പദയാത്രയും സമാപന സമ്മേളനവും സംഘടിപ്പിച്ചു

By ന്യൂസ് വയനാട് ബ്യൂറോ

ബത്തേരി: ‘ഭരണഘടനയാണ് കാവൽ, സമത്വമാണ് രാഷ്ട്രീയം, ലഹരിയാണ് ശത്രു’ എന്ന മുദ്രാവാക്യമുയർത്തി യൂത്ത് കോൺഗ്രസ് സംസ്ഥാന പ്രസിഡന്റും കായിക യുവജന ക്ഷേമ വകുപ്പ് മന്ത്രിയുമായ ഒ.ജെ. ജനീഷിന്റെ നേതൃത്വത്തിൽ സംസ്ഥാന വ്യാപകമായി നടത്തുന്ന ജെൻ ഇന്ത്യ മൂവ്മെന്റിന്റെ ഭാഗമായി യൂത്ത് കോൺഗ്രസ് വയനാട് ജില്ലാ കമ്മിറ്റിയുടെ നേതൃത്വത്തിൽ സുൽത്താൻബത്തേരിയിൽ പദയാത്ര സംഘടിപ്പിച്ചു. കൊളഗപ്പാറയിൽ നിന്ന് ആരംഭിച്ച യാത്ര സുൽത്താൻബത്തേരി സ്വതന്ത്രമൈതാനിയിൽ സമാപിച്ചു.

തുടർന്ന് നടന്ന സമാപന സമ്മേളനം ഉദ്ഘാടനം ചെയ്ത കൃഷിവകുപ്പ് മന്ത്രി ടി. സിദ്ദീഖ്, രാജ്യത്തെ ജനാധിപത്യം തിരിച്ചുപിടിക്കാൻ സ്വാതന്ത്ര്യ സമരത്തെ അനുസ്മരിപ്പിക്കും വിധമുള്ള പ്രതിഷേധങ്ങളാണ് രാജ്യത്താകമാനം നടക്കുന്നതെന്ന് പറഞ്ഞു. സമാനതകളില്ലാത്ത തരത്തിൽ രാജ്യം ഭരിക്കുന്ന പാർട്ടിയുടെ നേതൃത്വത്തിൽ ജനങ്ങളുടെ കൈയ്യിൽ നിന്ന് വോട്ടവകാശം കവർന്നെടുക്കുകയാണെന്നും അദ്ദേഹം ആരോപിച്ചു.

സമ്മേളനത്തിൽ അധ്യക്ഷത വഹിച്ച യൂത്ത് കോൺഗ്രസ് സംസ്ഥാന പ്രസിഡന്റ് ഒ.ജെ. ജെനീഷ്, രാജ്യത്തെ ജനങ്ങളുടെ പൗരാവകാശമായ വോട്ടവകാശത്തെ നിഷേധിക്കുന്ന സമീപനത്തിലൂടെയാണ് മോദി സർക്കാർ മൂന്നാമതും അധികാരത്തിലെത്തിയതെന്ന് ആരോപിച്ചു. പൗരാവകാശങ്ങളെ പോലും ലംഘിക്കുന്ന രാഷ്ട്രീയ സാഹചര്യമാണ് രാജ്യത്ത് നിലനിൽക്കുന്നതെന്നും നരേന്ദ്ര മോദി സർക്കാറിന്റെ വോട്ടുകൊള്ള തെളിവുസഹിതം ആദ്യമായി രാജ്യത്തോട് വിളിച്ചുപറഞ്ഞത് പ്രതിപക്ഷനേതാവ് രാഹുൽ ഗാന്ധിയാണെന്നും അദ്ദേഹം കൂട്ടിച്ചേർത്തു.

ചടങ്ങിൽ സംസ്ഥാന വർക്കിങ് പ്രസിഡന്റ് ബിനു ചുള്ളിയിൽ, ഉഷാ വിജയൻ എം.എൽ.എ, യൂത്ത് കോൺഗ്രസ് ജില്ലാ പ്രസിഡന്റ് അമൽ ജോയി ഉൾപ്പെടെയുള്ള സംസ്ഥാന-ജില്ലാ നേതാക്കൾ സംസാരിച്ചു.