തകർന്ന റോഡ്, മാലിന്യക്കൂമ്പാരം; നെല്ലാറച്ചാൽ വ്യൂപോയിൻ്റിലേക്കുള്ള യാത്ര ദുരിതയാത്ര.
അമ്പലവയൽ: പ്രകൃതിരമണീയമായ നെല്ലാറച്ചാൽ വ്യൂ പോയിൻ്റിലേക്ക് എത്തുന്ന വിനോദസഞ്ചാരികളെ കാത്തിരിക്കുന്നത് ദുരിതയാത്ര. തകർന്ന റോഡും, അലക്ഷ്യമായി വലിച്ചെറിയുന്ന മാലിന്യങ്ങളുമാണ് ഇവിടുത്തെ പ്രധാന പ്രശ്നങ്ങൾ. നിരവധി സന്ദർശകർ എത്തിയിരുന്ന ഈ പ്രദേശം ഇപ്പോൾ അടിസ്ഥാന സൗകര്യങ്ങളുടെ അഭാവം മൂലം പിന്നോട്ട് പോവുകയാണ്.
തകർന്ന റോഡുകൾ, ചെളി നിറഞ്ഞ പാർക്കിംഗ്
കവലയിൽ നിന്ന് വ്യൂ പോയിൻ്റിലേക്ക് തിരിയുന്ന റോഡ് പൂർണമായും തകർന്നിരിക്കുകയാണ്. വർഷങ്ങൾക്ക് മുൻപ് നടത്തിയ ടാറിങ് പൂർണ്ണമായി ഇളകിപ്പോയതിനാൽ റോഡിൽ നിറയെ വലിയ കുഴികളാണ്. മഴ പെയ്യുമ്പോൾ ഈ കുഴികളിൽ വെള്ളവും ചെളിയും നിറയുന്നത് യാത്ര കൂടുതൽ ദുഷ്കരമാക്കുന്നു. സന്ദർശകരെ വരവേൽക്കുന്നത് ഈ ശോച്യാവസ്ഥയാണ്.
വ്യൂ പോയിൻ്റിന് സമീപത്തെ പാർക്കിങ് ഏരിയയുടെ സ്ഥിതിയും വ്യത്യസ്തമല്ല. മഴ പെയ്യുമ്പോൾ ചെളിക്കുളമായി മാറുന്ന ഇവിടെ വാഹനങ്ങൾ തെന്നിമാറുന്നത് പതിവാണ്. വാഹനങ്ങൾ പാർക്ക് ചെയ്യുന്ന സ്ഥലം മുളകൊണ്ടുള്ള വേലി കെട്ടി തിരിച്ചിട്ടുണ്ടെങ്കിലും, മറ്റ് അടിസ്ഥാന സൗകര്യങ്ങളൊന്നും ജലസേചന വകുപ്പ് ഒരുക്കിയിട്ടില്ല. ടൂറിസം സാധ്യതകൾ പ്രയോജനപ്പെടുത്താൻ ആവശ്യമായ സൗകര്യങ്ങൾ ഒരുക്കണമെന്ന ആവശ്യം ശക്തമാണെങ്കിലും അധികാരികളുടെ ഭാഗത്ത് നിന്ന് നടപടികൾ ഉണ്ടാകുന്നില്ല.
മാലിന്യങ്ങൾ പെരുകുന്നു, നിയന്ത്രണമില്ലാത്ത സന്ദർശനം
വ്യൂ പോയിൻ്റിലേക്കുള്ള റോഡിന് ഇരുവശവും പ്ലാസ്റ്റിക് മാലിന്യങ്ങൾ ഉൾപ്പെടെ വലിച്ചെറിഞ്ഞ നിലയിലാണ്. മാലിന്യങ്ങൾ നിക്ഷേപിക്കാൻ സൗകര്യമൊരുക്കിയിട്ടുണ്ടെങ്കിലും പലരും ഇത് ഉപയോഗിക്കാതെ തോന്നിയതുപോലെ വലിച്ചെറിയുകയാണ്. ഇത് തടയാൻ യാതൊരു നടപടിയും സ്വീകരിക്കുന്നില്ല. നിലവിൽ ജലസേചന വകുപ്പിന്റെ കീഴിലുള്ള ഈ പ്രദേശത്ത് ജീവനക്കാരെ ആരെയും നിയമിച്ചിട്ടില്ല. ഇത് സന്ദർശകർക്ക് ഇഷ്ടംപോലെ പെരുമാറാനുള്ള സാഹചര്യമൊരുക്കുന്നു.
നേരത്തെ, ഇവിടെ ഓഫ് റോഡ് നടത്തിയ ജീപ്പ് ഡാമിൽ വീണ സംഭവമുണ്ടായതിന് ശേഷമാണ് വാഹനങ്ങൾക്ക് നിയന്ത്രണമേർപ്പെടുത്തി വേലി കെട്ടി തിരിച്ചത്. എന്നാൽ അതിനുശേഷം വിനോദസഞ്ചാരികളുടെ എണ്ണം കുറഞ്ഞുവെന്നാണ് നാട്ടുകാർ പറയുന്നത്. ആവശ്യമായ അടിസ്ഥാന സൗകര്യങ്ങൾ ഒരുക്കി ഈ പ്രദേശത്തെ ഒരു പ്രധാന വിനോദസഞ്ചാര കേന്ദ്രമാക്കി മാറ്റിയാൽ കൂടുതൽ സന്ദർശകരെ ആകർഷിക്കാൻ കഴിയുമെന്നാണ് നാട്ടുകാരുടെ അഭിപ്രായം.
Leave a Reply