ചുണ്ടേലിനെ വിറപ്പിച്ച പുലി കുടുങ്ങി; പിടികൂടിയ പുലിയെ ബത്തേരിയിലെ പരിചരണ കേന്ദ്രത്തിലേക്ക് മാറ്റി

By ന്യൂസ് വയനാട് ബ്യൂറോ

ചുണ്ടേൽ: കഴിഞ്ഞ കുറച്ചു ദിവസങ്ങളായി ചുണ്ടേൽ പ്രദേശത്തെ ജനവാസ മേഖലകളിൽ ഭീതി പടർത്തിയിരുന്ന പുലി ഒടുവിൽ വനംവകുപ്പിന്റെ കെണിയിൽ കുടുങ്ങി. മാസങ്ങളായി നാട്ടുകാരുടെ ഉറക്കം കെടുത്തിയ പുലിയെ പിടികൂടിയതോടെ വലിയൊരു ആശങ്കയ്ക്കാണ് വിരാമമായിരിക്കുന്നത്.

മേപ്പാടി റേഞ്ച് ഓഫീസർ ബിജുവിന്റെ നേതൃത്വത്തിൽ വനംവകുപ്പ് ഉദ്യോഗസ്ഥർ കഴിഞ്ഞ ഏതാനും ദിവസങ്ങളായി പ്രദേശത്ത് ശക്തമായ നിരീക്ഷണം നടത്തിവരികയായിരുന്നു. പുലിയുടെ സാന്നിധ്യം ഉറപ്പുവരുത്തിയതിനെത്തുടർന്ന് ഈ മാസം 9-ാം തീയതിയാണ് പ്രദേശത്ത് കൂട് സ്ഥാപിച്ചത്.

കൃത്യമായ മോണിറ്ററിങ്ങിലൂടെ പുലിയുടെ സഞ്ചാരപഥം തിരിച്ചറിഞ്ഞാണ് കൂട് സ്ഥാപിക്കാനുള്ള നടപടികൾ സ്വീകരിച്ചതെന്ന് മേപ്പാടി ഫോറസ്റ്റ് റേഞ്ച് ഓഫീസർ ബിജു വൈത്തിരി ലൈവിനോട് പറഞ്ഞു.

പിടികൂടിയ പുലിയെ ആരോഗ്യപരിശോധനകൾക്കും വിദഗ്ധ പരിചരണത്തിനുമായി പുൽപ്പള്ളി-ബത്തേരി റോഡിലുള്ള വനംവകുപ്പിന്റെ ആനിമൽ ഹോസ്പിറ്റലിലേക്ക് (പാലിയേറ്റീവ് കെയർ സെന്റർ ഫോർ അനിമൽസ് ) മാറ്റി. പരിശോധനകൾക്ക് ശേഷം പുലിയുടെ ആരോഗ്യനില തൃപ്തികരമാണെങ്കിൽ തുടർനടപടികൾ സ്വീകരിക്കും.

ബിജു (മേപ്പാടി റേഞ്ച് ഓഫീസർ),സിനു (വൈത്തിരി സെക്ഷൻ ഫോറസ്റ്റ് ഓഫീസർ),   ഉദ്യോഗസ്ഥരായ സജിമോൻ, സജി, ഹാഷിഫ്  എന്നിവർ ദൗത്യത്തിന് നേതൃത്വം നൽകി.

വന്യമൃഗശല്യം രൂക്ഷമായ സാഹചര്യത്തിൽ വനംവകുപ്പ് നടത്തിയ ഈ സത്വര ഇടപെടലിന് വലിയ കയ്യടിയാണ് പ്രദേശവാസികളിൽ നിന്നും ലഭിക്കുന്നത്.