തുടർച്ചയായി കാട്ടാന ഇറങ്ങുന്ന മേഖല; ജെസിയെ ആക്രമിച്ചത് ഇന്നലെ രാത്രിയിൽ ജനവാസ മേഖലയിലെത്തിയ കാട്ടാനകളിലൊന്ന്

By ന്യൂസ് വയനാട് ബ്യൂറോ

മാനന്തവാടി: മേപ്പാടിയിൽ വീട്ടമ്മയെ ആക്രമിച്ച് കൊലപ്പെടുത്തിയത് ജനവാസ മേഖലയിൽ ഇറങ്ങിയ കാട്ടാന. ഇന്നലെ രാത്രിയിൽ ജനവാസ മേഖലയിൽ രണ്ട് കാട്ടാനകൾ ഇറങ്ങിയിരുന്നു. ഇവ നേരം പുലർന്നിട്ടും പ്രദേശത്ത് തങ്ങിയിരുന്നു. ഈ ആനകളിൽ ഒന്നാണ് ജെസിയെയും ഷാജിയെയും ആക്രമിച്ചത്. ജെസി സംഭവസ്ഥലത്ത് വച്ച് തന്നെ മരിച്ചു. ഷാജിയെ പരിക്കുകളോടെ ആശുപത്രിയിൽ പ്രവേശിപ്പിച്ചിരിക്കുകയാണ്.

തുടർച്ചയായി കാട്ടാന ഇറങ്ങുന്ന മേഖലയാണ് മേപ്പാടിയിലെ ഈ പ്രദേശം. ഇതിനോട് ചേർന്ന് സ്ഥലങ്ങളിലായി മുൻപും ആളുകൾക്ക് കാട്ടാന ആക്രമണത്തിൽ ജീവൻ നഷ്ടമായിട്ടുണ്ട്. ഫെൻസിംഗ് സ്ഥാപിക്കണമെന്ന് ആവശ്യത്തിനും ഈ മേഖലയിൽ പരിഹാരമായിട്ടില്ല. കാട്ടാനയെ മയക്കു വെടി വെക്കണമെന്ന് ആവശ്യപ്പെട്ട് മുണ്ടക്കൈ വനംവകുപ്പ് ഓഫീസ് ഉപരോധിച്ച നാട്ടുകാർ പിന്നീട് മേപ്പാടി റോഡും ഉപരോധിച്ചു.

കുടുംബത്തിന് 10 ലക്ഷം രൂപ സഹായധനം നൽകുമെന്ന് സർക്കാർ പ്രഖ്യാപിച്ചിട്ടുണ്ട്. കുടുംബത്തിൽ ഒരാൾക്ക് സർക്കാർ ജോലിയും നൽകുമെന്നാണ് പ്രഖ്യാപനം.