തരിയോട് ഗ്രാമ പഞ്ചായത്തിൽ പച്ചക്കറി കൃഷിക്ക് പുത്തൻ ഉണർവ്

By ന്യൂസ് വയനാട് ബ്യൂറോ

കൽപ്പറ്റ: പച്ചക്കറി കൃഷി പ്രോത്സാഹിപ്പിക്കുന്നതിനും പ്രാദേശികമായി പച്ചക്കറി ഉത്പാദനം വർധിപ്പിക്കുന്നതിനുമായി തരിയോട് ഗ്രാമ പഞ്ചായത്ത് കുടുംബശ്രീയുടെ നേതൃത്വത്തിൽ വിപുലമായ തൈ വിതരണം സംഘടിപ്പിച്ചു. പഞ്ചായത്തിലെ 14 വാർഡുകളിലായി 10,585 പച്ചക്കറി തൈകളാണ് വിതരണം ചെയ്തത്. അഞ്ച് ഇനം പച്ചക്കറി തൈകളാണ് പദ്ധതിയുടെ ഭാഗമായി എത്തിച്ചത്. മൂന്ന് മാസം കൊണ്ട് വിളവെടുക്കാൻ കഴിയുന്ന ഇനങ്ങളാണ് കൃഷിക്കായി ലഭ്യമാക്കിയിട്ടുള്ളത്. കുടുംബശ്രീ ജില്ലാ മിഷനിൽ നിന്നും ലഭ്യമാക്കിയ തൈകൾ കുടുംബശ്രീയുടെ കീഴിൽ കാർഷിക പ്രവർത്തനങ്ങൾ നടത്തുന്ന ജെ.എൽ.ജി ഗ്രൂപ്പുകൾക്കാണ് കൈമാറിയത്. പഞ്ചായത്തിലെ മുഴുവൻ വാർഡുകളെയും ഉൾപ്പെടുത്തിയുള്ള വിതരണത്തിലൂടെ കൂടുതൽ കുടുംബങ്ങളെ പച്ചക്കറി കൃഷിയുടെ ഭാഗമാക്കുകയാണ് ലക്ഷ്യം.വീട്ടാവശ്യത്തിനുള്ള പച്ചക്കറികൾ സ്വന്തം നിലയിൽ ഉത്പാദിപ്പിക്കാൻ കുടുംബങ്ങളെ പ്രാപ്തരാക്കുന്നതിനൊപ്പം വിപണിയെ ആശ്രയിക്കുന്നത് കുറയ്ക്കാനും ഇത്തരം പ്രവർത്തനങ്ങൾ സഹായിക്കും. കൃഷിയോടുള്ള താത്പര്യം വർധിപ്പിക്കുക, കൃഷിയിടങ്ങൾ കൂടുതൽ ഫലപ്രദമായി വിനിയോഗിക്കുക, കുടുംബശ്രീ അംഗങ്ങൾക്ക് കൂട്ടായ കാർഷിക പ്രവർത്തനങ്ങളിലൂടെ വരുമാന സാധ്യതകൾ കണ്ടെത്തുക തുടങ്ങിയ ലക്ഷ്യങ്ങളും പദ്ധതിക്കുണ്ട്. കാർഷിക മേഖലയിൽ സ്ത്രീകളുടെ പങ്കാളിത്തം ശക്തിപ്പെടുത്തുന്നതിലും കുടുംബശ്രീയുടെ ജെ.എൽ.ജി ഗ്രൂപ്പുകളെ കൂടുതൽ സജീവമാക്കുന്നതിലും തൈ വിതരണം പ്രാധാന്യമർഹിക്കുന്നു. വാർഡ് തലത്തിൽ ഏകോപിപ്പിച്ചുള്ള പ്രവർത്തനങ്ങളിലൂടെ തരിയോട് പഞ്ചായത്തിൽ പച്ചക്കറി കൃഷി കൂടുതൽ വ്യാപിപ്പിക്കാനാകുമെന്ന പ്രതീക്ഷയിലാണ് കുടുംബശ്രീ.