ഹരിതകര്മസേന യൂസര് ഫീസ്: വ്യാജ പ്രചാരണത്തിനെതിരെ നടപടിയെടുക്കും
കൽപ്പറ്റ : വീടുകളില് നിന്നും സ്ഥാപനങ്ങളില് നിന്നും ഹരിതകര്മ സേന ശേഖരിക്കുന്ന പ്ലാസ്റ്റിക് മാലിന്യങ്ങള്ക്ക് യൂസര് ഫീ വേണ്ടെന്ന തരത്തില് സോഷ്യല് മീഡിയയില് വ്യാജ പ്രചരണം നടത്തുന്നവര്ക്കെതിരെ നടപടിയെടുക്കുമെന്ന് ശുചിത്വ മിഷന് ജില്ലാ കോ ഓര്ഡിനേറ്റര് എസ്. ഹര്ഷന് അറിയിച്ചു. ഹരിത കര്മ്മ സേനയ്ക്ക് യൂസര് ഫീസ് നല്കേണ്ടെതില്ലെന്ന വ്യാജ വാര്ത്ത വാട്സാപ്പ് ഗ്രൂപ്പുകളില് പ്രചരിക്കുന്നത് ശ്രദ്ധയില്പ്പെട്ടിട്ടുണ്ട്. പ്ലാസ്റ്റിക് വേസ്റ്റ് മാനേജ്മെന്റ് ചട്ടപ്രകാരം തദ്ദേശസ്വയംഭരണ സ്ഥാപനങ്ങള് നിശ്ചയിക്കുന്ന യൂസര് ഫീ നല്കാന് വീട്ടുടമസ്ഥര് ബാധ്യസ്ഥരാണ്. വ്യാജ വാര്ത്തകള് പ്രചരിപ്പിക്കുന്നത് സൈബര് കുറ്റകൃത്യമാണെന്നും ഉത്തരവാദികള്ക്കെതിരെ നിയമ നടപടികള് സ്വീകരിക്കുമെന്നും ശുചിത്വ മിഷന് അറിയിച്ചു.
Leave a Reply