താമരശ്ശേരിയിൽ ബസ്സിൽ ഒമ്നി ഇടിച്ച് ഏഴുപേർക്ക് പരുക്ക്; ഡ്രെെവറെ പുറത്തെടുത്തത് വാൻ വെട്ടിപ്പൊളിച്ച്

By ന്യൂസ് വയനാട് ബ്യൂറോ

താമരശ്ശേരി: കാരാടിയിൽ നിയന്ത്രണം വിട്ട ഒമ്നി വാൻ കെ എസ് ആർ ടി സി ബസ്സിൽ ഇടിച്ച് 7 പേർക്ക് പരുക്കേറ്റേു. ഇന്ന് വൈകീട്ട് 5 മണിയോടെയായിരുന്നു അപകടം. കോഴിക്കോട് ഭാഗത്ത് നിന്നും വയനാട് ഭാഗത്തേക്ക് വരികയായിരുന്ന വാൻ ബത്തേരിയിൽ നിന്നും കോഴിക്കോട്ടേക്ക് പോകുകയായിരുന്ന ബസ്സിൻ്റെ വലതു വശത്ത് ഇടിക്കുകയായിരുന്നു.

വാനിൽ ഉണ്ടായിരുന്ന വയനാട്‌ കമ്പളക്കാട് സ്വദേശികളായ മുഹമ്മദ് നൗഷാദ്, മക്കളായ മുഹമ്മദ് അജ്നാൻ, മുഹമ്മദ് സഫ് വാൻ, കെ എസ് ആർ ടി സി യാത്രക്കാരായ ഹരികൃഷ്ണ (ഈങ്ങാപ്പുഴ), രസിത (താമരശ്ശേരി), അബദുൽ സലാം (മാവൂർ), സൗമിനി (അമ്പായത്തോട്) എന്നിവർക്കാണ് പരുക്കേറ്റത്.

വാൻ ഡ്രൈവറായ മുഹമ്മദ് നൗഷാദിൻ്റെ പരുക്ക് സാരമുള്ളതാണ്. വാൻ വെട്ടിപൊളിച്ചാണ് ഇയാളെ പുറത്തെടുത്തത്. വാനിൽ ഉണ്ടായിരുന്നവരെ താമരശ്ശേരി താലൂക്ക് ആശുപത്രിയിൽ പ്രാഥമിക ചികിത്സ നൽകിയ ശേഷം കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി. താമരശ്ശേരി പോലീസും, നാട്ടുകാരും ചേർന്ന് രക്ഷാപ്രവർത്തനം നടത്തി.