വോട്ട് രേഖപ്പെടുത്താന് തിരിച്ചറിയല് രേഖ നിര്ബന്ധം; ഭിന്നശേഷി വോട്ടര്മാര്ക്കും മുതിര്ന്ന പൗരന്മാര്ക്കും മുന്ഗണന
കൽപ്പറ്റ: നിയമസഭാ തെരഞ്ഞെടുപ്പിന് വോട്ട് രേഖപ്പെടുത്താന് പോളിംഗ് ബൂത്തുകളില് എത്തിച്ചേരുന്നവര് അംഗീകൃത തിരിച്ചറിയല് രേഖ നിര്ബന്ധമായും ഹാജരാക്കണം. തെരഞ്ഞെടുപ്പ് കമ്മീഷന് നല്കുന്ന ഫോട്ടോ ഐഡന്റിറ്റി കാര്ഡാണ് (എപിക്) പ്രധാന തിരിച്ചറിയല് രേഖ. ഇത് ലഭ്യമല്ലാത്തവര്ക്ക് ആധാര് കാര്ഡ്, തൊഴിലുറപ്പ് പദ്ധതി ജോബ് കാര്ഡ്, ബാങ്ക് അല്ലെങ്കില് പോസ്റ്റ് ഓഫീസ് നല്കുന്ന ഫോട്ടോ പതിച്ച പാസ്ബുക്ക്, ഹെല്ത്ത് ഇന്ഷുറന്സ് സ്മാര്ട്ട് കാര്ഡ് അല്ലെങ്കില് ആയുഷ്മാന് ഭാരത് കാര്ഡ്, ഡ്രൈവിംഗ് ലൈസന്സ്, പാന് കാര്ഡ്, എന്.പി.ആറിന്റെ ഭാഗമായി നല്കിയ സ്മാര്ട്ട് കാര്ഡ്, പാസ്പോര്ട്ട്, ഫോട്ടോയോടുകൂടിയ പെന്ഷന് രേഖ, കേന്ദ്ര-സംസ്ഥാന സര്ക്കാറുകളോ പൊതു മേഖല സ്ഥാപനങ്ങളോ നല്കുന്ന ഫോട്ടോ തിരിച്ചറിയല് കാര്ഡുകള്, എം.പി/എം.എല്.എമാരുടെ ഔദ്യോഗിക തിരിച്ചറിയല് കാര്ഡുകള്, കേന്ദ്ര സാമൂഹ്യനീതി / ശാക്തീകരണ മന്ത്രാലയം നല്കുന്ന യുണീക് ഡിസബിലിറ്റി ഐഡി (യു.ഡി ഐ.ഡി) കാര്ഡ് എന്നീ രേഖകളില് ഏതെങ്കിലും ഒന്ന് ഉപയോഗിച്ച് വോട്ട് ചെയ്യാവുന്നതാണ്.
പോളിങ് ബൂത്തിനകത്ത് മൊബൈല് ഫോണ്, ക്യാമറ, മറ്റ് ഇലക്ട്രോണിക് ഉപകരണങ്ങള് എന്നിവ കൊണ്ടുവരുന്നതില് നിയന്ത്രണമുണ്ട്. ഭിന്നശേഷി വോട്ടര്മാര്ക്കും മുതിര്ന്ന പൗരന്മാര്ക്കും വോട്ടെടുപ്പ് ദിവസം പോളിങ് ബൂത്തികളില് മുന്ഗണന നല്കും. ബൂത്തുകളില് റാംപുകളും വീല്ചെയറുകളും സജ്ജീകരിക്കും. കാഴ്ച പരിമിതിയുള്ളവര്ക്കായി ബ്രെയില് ലിപി സൗകര്യമുള്ള ഇലക്ട്രോണിക് വോട്ടിംഗ് മെഷീനുകള്, സഹായത്തിനായി പ്രത്യേക വളണ്ടിയര്മാര്, ആവശ്യമായ ഇടങ്ങളില് ആംഗ്യഭാഷാ സഹായം എന്നിവയും ലഭ്യമാക്കും. ഭിന്നശേഷിക്കാരായ വോട്ടര്മാര്ക്ക് പോളിങ് കേന്ദ്രങ്ങളിലെത്തുന്നതിനായി യാത്രാസൗകര്യം ലഭ്യമാക്കുമെന്നും തെരഞ്ഞെടുപ്പ് കമ്മീഷന് അറിയിച്ചിട്ടുണ്ട്.
Leave a Reply