മാതൃകയായി തൊഴിലാളികൾ; തരുവണ ടൗണിലെ ഹൈമാസ്റ്റ് ലൈറ്റ് മറച്ച മരച്ചില്ലകൾ വെട്ടിമാറ്റി

By ന്യൂസ് വയനാട് ബ്യൂറോ

തരുവണ: ലോക തൊഴിലാളി ദിനത്തിൽ തരുവണയിലെ ചുമട്ടുതൊഴിലാളികൾ ടൗണിന് മാതൃകയായി. മാസങ്ങളായി തരുവണ ടൗണിലെ ഹൈമാസ്റ്റ് ലൈറ്റിന് സമീപത്തെ മരത്തിന്റെ ചില്ലകൾ വളർന്നു പന്തലിച്ച് വിളക്കുകൾ മറച്ച നിലയിലായിരുന്നു. ഇതുമൂലം ടൗണിൽ വെളിച്ചം ലഭിക്കാതെ പൊതുജനങ്ങൾ വലിയ ബുദ്ധിമുട്ടാണ് അനുഭവിച്ചിരുന്നത്. ഈ പ്രശ്നത്തിനാണ് തൊഴിലാളി ദിനത്തിൽ ചുമട്ടുതൊഴിലാളികൾ ചേർന്ന് പരിഹാരം കണ്ടത്. ഹൈമാസ്റ്റ് ലൈറ്റിനെ മറച്ചുനിന്ന മരക്കൊമ്പുകൾ വെട്ടിമാറ്റി പ്രകാശം ഉറപ്പാക്കിയ തൊഴിലാളികളുടെ പ്രവർത്തി നാടിന്റെ പ്രശംസ പിടിച്ചുപറ്റി. പ്രവർത്തനങ്ങൾക്ക് സി.എച്ച്. ഉമ്മർ, ഹമീദ്, പള്ളിക്കണ്ടി അബ്ദുള്ള, ശംസു, ഇബ്രാഹിം തുടങ്ങിയവർ നേതൃത്വം നൽകി.