കർഷകർ ജപ്തി ഭീഷണിയിൽ; ആത്മഹത്യാ മുനമ്പിൽ ജീവിതം തള്ളിനീക്കി

By ന്യൂസ് വയനാട് ബ്യൂറോ

കൽപ്പറ്റ : കോവിഡും, കാലവർഷക്കെടുതിയും, വന്യമൃഗശല്യവും കാരണം ദുരിതത്തിലായ വയനാട്ടിലെ ആയിരക്കണക്കിന് കർഷക കുടുംബങ്ങൾ ബാങ്കുകളിൽ നിന്ന് എടുത്ത കാർഷിക വായ്പകൾ തിരിച്ചടയ്ക്കാൻ കഴിയാതെ ജപ്തി ഭീഷണി നേരിടുന്നു. വീടും സ്ഥലവും നഷ്ടപ്പെട്ട് ആത്മഹത്യയുടെ വക്കിലാണിവർ. പനമരം കാർഷിക വികസന ബാങ്കിൽ നിന്ന് വായ്പയെടുത്ത നിരവധി കർഷകരാണ് ഇത്തരത്തിൽ ദുരിതത്തിലായിരിക്കുന്നത്.

ഇതിനൊരു ഉദാഹരണമാണ് തിരുനെല്ലി പഞ്ചായത്തിലെ ത്രിശ്ശില്ലേരി, പ്ലാമൂല വീട്ടിൽ താമസിക്കുന്ന വി.വി. നാരായണ വാര്യരുടെ അനുഭവം. വായ്പ തിരിച്ചടയ്ക്കാത്തതിനെ തുടർന്ന് ഇദ്ദേഹത്തിന്റെ സ്ഥലം ജപ്തി ചെയ്യാനെത്തിയ ബാങ്ക് അധികൃതർ നാരായണ വാര്യർ ആവശ്യപ്പെട്ട സാവകാശം പോലും പരിഗണിക്കാൻ തയ്യാറായില്ലെന്ന് ആരോപണമുണ്ട്. വിവരമറിഞ്ഞ ഡി.സി.സി. പ്രസിഡന്റ് എൻ.ഡി. അപ്പച്ചൻ ഉൾപ്പെടെയുള്ള നൂറുകണക്കിന് കോൺഗ്രസ്, യു.ഡി.എഫ്. നേതാക്കൾ നാരായണ വാര്യർക്ക് സംരക്ഷണം നൽകാനായി അദ്ദേഹത്തിന്റെ വീട്ടിൽ തടിച്ചുകൂടി.

കർഷകരുടെ ഭൂമി ജപ്തി ചെയ്യാൻ അനുവദിക്കില്ലെന്നും, അവരുടെ കടങ്ങൾ എഴുതിത്തള്ളുകയും പലിശ പൂർണ്ണമായും ഒഴിവാക്കുകയും ചെയ്യണമെന്ന് നേതാക്കൾ ആവശ്യപ്പെട്ടു. വയനാട് ജില്ലയിൽ ഇത്തരത്തിലുള്ള ആയിരക്കണക്കിന് കേസുകൾ നിലവിലുണ്ടെന്നും, പാവപ്പെട്ട കർഷകർ വലിയ ഭീതിയിലാണെന്നും അവർ ചൂണ്ടിക്കാട്ടി.

സർക്കാരിനെതിരെ രൂക്ഷവിമർശനവുമായി കോൺഗ്രസ്
ഇന്ത്യൻ നാഷണൽ കോൺഗ്രസ്സും വിവിധ കർഷക സംഘടനകളും ഈ വിഷയം കേരള സർക്കാരിന്റെ ശ്രദ്ധയിൽപ്പെടുത്തിയിട്ടും അനുകൂലമായ നടപടികൾ ഉണ്ടാകുന്നില്ലെന്ന് ഡി.സി.സി. പ്രസിഡന്റ് എൻ.ഡി. അപ്പച്ചൻ ആരോപിച്ചു. മുഖ്യമന്ത്രി പിണറായി വിജയന്റെ നേതൃത്വത്തിലുള്ള സർക്കാർ ജനവിരുദ്ധമാണെന്നും, കർഷകരോട് നീതികേട് കാണിക്കുകയാണെന്നും അദ്ദേഹം പറഞ്ഞു. വൻകിട മുതലാളിമാർക്ക് എല്ലാ ഒത്താശയും നൽകി അവരെ സംരക്ഷിക്കുന്ന സർക്കാരാണിതെന്നും, കോടികളുടെ അഴിമതി നടത്തുന്നവർക്കെതിരെ നടപടിയില്ലെന്നും അദ്ദേഹം വിമർശിച്ചു.

കഴിഞ്ഞ ഒൻപത് വർഷമായി പിണറായി സർക്കാരിന്റെ ഭരണത്തിൽ കേരളത്തിലെ ജനങ്ങൾ കടക്കെണിയിലകപ്പെട്ട് ആത്മഹത്യ ചെയ്ത സംഭവങ്ങൾ നിരവധിയാണെന്നും അപ്പച്ചൻ ഓർമ്മിപ്പിച്ചു. നിത്യോപയോഗ സാധനങ്ങളുടെ വിലക്കയറ്റവും നികുതി വർദ്ധനവും ജനജീവിതം ദുസ്സഹമാക്കുമ്പോഴും ജനങ്ങൾക്ക് ആശ്വാസം നൽകാൻ സർക്കാർ തയ്യാറാകുന്നില്ലെന്നും അദ്ദേഹം കുറ്റപ്പെടുത്തി.

ശക്തമായ പ്രക്ഷോഭവുമായി മുന്നോട്ട് പോകുമെന്ന് മുന്നറിയിപ്പ്
കർഷകർക്ക് വേണ്ട സഹായങ്ങൾ നൽകി അവരെ സംരക്ഷിക്കാൻ സർക്കാർ ഇനിയെങ്കിലും തയ്യാറായില്ലെങ്കിൽ ശക്തമായ പ്രക്ഷോഭവുമായി മുന്നോട്ട് പോകുമെന്ന് വയനാട് ജില്ലാ കോൺഗ്രസ് കമ്മിറ്റി നേതൃയോഗം തീരുമാനിച്ചതായി ഡി.സി.സി. പ്രസിഡന്റ് എൻ.ഡി. അപ്പച്ചൻ അറിയിച്ചു. കർഷകരുടെ അതിജീവനത്തിനായി കോൺഗ്രസ് പോരാടുമെന്ന് അദ്ദേഹം വ്യക്തമാക്കി.