വെള്ളമുണ്ട പുളിഞ്ഞാൽ-നാരോകടവ് റോഡ് പുനർനിർമ്മാണം: മനുഷ്യാവകാശ കമ്മീഷൻ തൽസ്ഥിതി റിപ്പോർട്ട് ആവശ്യപ്പെട്ടു

By ന്യൂസ് വയനാട് ബ്യൂറോ

കൽപ്പറ്റ: വെള്ളമുണ്ട ഗ്രാമപഞ്ചായത്തിലെ പുളിഞ്ഞാൽ-നാരോകടവ് റോഡിന്റെ പുനർനിർമ്മാണം സംബന്ധിച്ച് തൽസ്ഥിതി റിപ്പോർട്ട് സമർപ്പിക്കാൻ മനുഷ്യാവകാശ കമ്മീഷൻ ജുഡീഷ്യൽ അംഗം കെ. ബൈജുനാഥ് ഉത്തരവിട്ടു. വെള്ളമുണ്ട ഗ്രാമപഞ്ചായത്ത് സെക്രട്ടറിക്കാണ് കമ്മീഷൻ നിർദ്ദേശം നൽകിയിരിക്കുന്നത്.

2024 ജൂലൈ 27-നകം റോഡിന്റെ പുനർനിർമ്മാണം പൂർത്തിയാക്കാമെന്ന് എക്സിക്യൂട്ടീവ് എഞ്ചിനീയർ ഗ്രാമപഞ്ചായത്ത് സെക്രട്ടറിക്ക് ഉറപ്പ് നൽകിയിരുന്നു. ഈ സമയപരിധി കഴിഞ്ഞ സാഹചര്യത്തിലാണ് കമ്മീഷൻ ഇപ്പോൾ തൽസ്ഥിതി റിപ്പോർട്ട് ആവശ്യപ്പെട്ടിരിക്കുന്നത്.

നല്ലൂർനാട് സ്വദേശി കെ.കെ. നാസർ സമർപ്പിച്ച പരാതിയിലാണ് കമ്മീഷന്റെ നടപടി. റോഡ് പൂർണ്ണമായും പൊളിച്ചതിനെ തുടർന്ന് കഴിഞ്ഞ നാല് വർഷമായി ഇതുവഴിയുള്ള വാഹനഗതാഗതം അസാധ്യമാണെന്ന് പരാതിയിൽ പറയുന്നു.

വെള്ളമുണ്ട പുളിഞ്ഞാൽ മൊതക്കര തോട്ടോളിപ്പടി റോഡിന്റെ പുനർനിർമ്മാണം 2020-ലാണ് പി.എം.ജി.എസ്.വൈ-ക്ക് (പ്രധാനമന്ത്രി ഗ്രാമ സടക് യോജന) കൈമാറിയത്. എന്നാൽ, ജല അതോറിറ്റിയുടെ പണികൾ പൂർത്തിയാകാത്ത സാഹചര്യത്തിൽ നിർമ്മാണ പ്രവർത്തനങ്ങൾക്ക് കാലതാമസമുണ്ടായതായി പഞ്ചായത്ത് സെക്രട്ടറി കമ്മീഷനെ അറിയിച്ചിരുന്നു.

ഈ വിഷയത്തിൽ കൂടുതൽ വിവരങ്ങൾ ലഭ്യമാകുന്ന മുറയ്ക്ക് റിപ്പോർട്ട് പുറത്തുവിടുന്നതാണ്.