മനുഷ്യാവകാശ കമ്മീഷൻ ഇടപെട്ടു:കെട്ടിട നമ്പർ ലഭിച്ചാലുടൻ കുടിവെള്ള കണക്ഷൻ നൽകും 

By ന്യൂസ് വയനാട് ബ്യൂറോ

വയനാട്: പട്ടികവർഗ പണിയ വിഭാഗത്തിലുള്ള കുടുംബത്തിന് കെട്ടിട നമ്പർ ലഭിച്ചാലുടൻ കുടിവെള്ള കണക്ഷൻ നൽകുമെന്ന് ജില്ലാ പട്ടികവർഗ വികസന ഓഫീസർ മനുഷ്യാവകാശ കമ്മീഷനെ അറിയിച്ചു.

കമ്മീഷൻ ജുഡീഷ്യൽ അംഗം കെ.ബൈജുനാഥിന്റെ ഇടപെടലിനെ തുടർന്നാണ് നടപടി.

സുൽത്താൻ ബത്തേരി മീനങ്ങാടി അഞ്ചാം വാർഡിൽ താമസിക്കുന്ന തങ്കമ്മ സമർപ്പിച്ച പരാതിയിൽ ആവശ്യമായ നടപടി സ്വീകരിക്കാൻ കമ്മീഷൻ നിർദ്ദേശം നൽകിയിരുന്നു.

പരാതിക്കാരിയുടെ കുടുംബം കുടിവെള്ളക്ഷാമം നേരിടുന്നുണ്ടെന്നും ജൽജീവൻ മിഷൻ പദ്ധതിയുടെ പൈപ്പ് ലൈൻ പരാതിക്കാരിയുടെ വീടിന് സമീപം വരെ സ്ഥാപിച്ചിട്ടുണ്ടെന്നും വീട്ടു നമ്പർ ലഭിച്ചാൽ കണക്ഷൻ നൽകുമെന്നും ജില്ലാ പട്ടിക വർഗ വികസന ഓഫീസർ കമ്മീഷനെ അറിയിച്ചു.