ജില്ലാ പഞ്ചായത്ത്; അമ്പലവയലിൽ വീറും വാശിയും

By ന്യൂസ് വയനാട് ബ്യൂറോ

അമ്പലവയൽ പഞ്ചായത്തിലെ നാല് വാർഡുകളും നെൻമേനി പഞ്ചായത്തിലെ 18 വാർഡുകളും ഉൾപെടുന്ന ജില്ലാ പഞ്ചായത്ത് അമ്പലവയൽ ഡിവിഷനിൽ ഇത്തവണ തെരഞ്ഞെടുപ്പിൽ വീറും വാശിയും ഏറെയാണ്. കഴിഞ്ഞ രണ്ടു തവണയും എൽ.ഡി.എഫിനായിരുന്നു ഇവിടെ ജയം. എന്നാൽ, കഴിഞ്ഞ തവണത്തെ അപേക്ഷിച്ച് വാർഡുകളിൽ ഇത്തവണ ഘടനയിൽ മാറ്റമുണ്ടായതും അമ്പലവയൽ എൽ.ഡി.എഫും നെൻമേനി യു.ഡി.എഫും ഭരിക്കുന്നതും ആര് ജയിക്കുമെന്ന പ്രവചനം അസാധ്യമാക്കുകയാണ്. വനിത സംവരണ വാർഡായി അമ്പലവയൽ ഡിവിഷനിൽ രണ്ടു മുന്നണികളും കരുത്തരായ സ്ഥാനാർത്ഥികളെ തന്നെയാണ് രംഗത്തിറക്കിയത്. ഇന്ത്യൻ നാഷണൽ കോൺഗ്രസിലെ ജിനി തോമസ് യു.ഡി.എഫിന് വേണ്ടി മത്സരിക്കുമ്പോൾ എൽ.ഡി.എഫിന് വേണ്ടി 2015 ലെ തെരഞ്ഞെടുപ്പിൽ വിജയിച്ച എൻ.പി കുഞ്ഞുമോളെ തന്നെയാണ് സി.പി.എം ഇത്തവണ സ്ഥാനാർത്ഥിയാക്കിയത്. ബി.ജെ.പി ക്ക് വേണ്ടി ഏലിയാമ്മ വര്‍ഗ്ഗീസും രംഗത്തുണ്ട്. കഴിഞ്ഞ തവണ എൽ.ഡി.എഫ് സ്ഥാനാർത്ഥിയായിരുന്നു സുരേഷ് താളൂർ ജയിച്ച ഡിവിഷൻ ഇത്തവണ പിടിച്ചെടുക്കുമെന്ന ദൃഢ നിശ്ചയത്തിൽ യു.ഡി.എഫ് പ്രാചാരണ പ്രവർത്തനങ്ങൾ ആരംഭിച്ചു കഴിഞ്ഞു. എന്നാൽ എൽ.ഡി.എഫ് ആകട്ടെ ഡിവിഷൻ നില നിർത്തുമെന്ന ദൃഢ നിശ്ചയത്തിലും. ഡിവിഷനിലെ വാർഡുകളുടെ ഘടനയിൽ ഇത്തവണ കാര്യമായ മാറ്റം വന്നത് കാരണം കാറ്റ് എങ്ങോട്ട് ഒഴുകുമെന്ന കാര്യത്തിൽ നിശ്ചയമില്ല.