തെരഞ്ഞെടുപ്പ് നിരീക്ഷണം: മീഡിയ സെൽ പ്രവർത്തനം ജില്ലാ കളക്ടർ സന്ദർശിച്ചു
കൽപ്പറ്റ: നിയമസഭാ തെരഞ്ഞെടുപ്പുമായി ബന്ധപ്പെട്ട് മാധ്യമ നിരീക്ഷണത്തിനും രാഷ്ട്രീയ പരസ്യങ്ങള്ക്ക് അനുമതി നല്കുന്നതിനുമായി ജില്ലാ ഇന്ഫര്മേഷന് ഓഫീസില് പ്രവര്ത്തനമാരംഭിച്ച എംസിഎംസി (മീഡിയ സര്ട്ടിഫിക്കേഷന് ആന്റ് മോണിറ്ററിംഗ് കമ്മിറ്റി) തെരഞ്ഞെടുപ്പ് ഓഫീസറായ ജില്ലാ കളക്ടര് ഡി.ആര് മേഘശ്രീ സന്ദര്ശിച്ചു. മാധ്യമ നിരീക്ഷണവുമായി ബന്ധപ്പെട്ട പ്രവര്ത്തനങ്ങള് കളക്ടര് വിലയിരുത്തി. എംസിഎംസി നോഡല് ഓഫീസറായ ജില്ലാ ഇന്ഫര്മേഷന് ഓഫീസര് പി.റഷീദ് ബാബു മീഡിയാ സെല്ലിന്റെ പ്രവര്ത്തനങ്ങള് വിശദീകരിച്ചു.
രാഷ്ട്രീയ പരസ്യങ്ങള് പരിശോധിച്ച് അംഗീകാരം നല്കുന്നതിനും തെരഞ്ഞെടുപ്പ് കമ്മീഷന് മാധ്യമങ്ങള്ക്കായി പുറപ്പെടുവിച്ചിട്ടുള്ള നിര്ദേശങ്ങള് കര്ശനമായി പാലിക്കുന്നുണ്ടെന്ന് ഉറപ്പാക്കുന്നതിനായുമാണ് ജില്ലാ കളക്ടര് ചെയര്മാനായിട്ടുള്ള എം.സി.എം.സി. പ്രവര്ത്തിക്കുന്നത്. രണ്ട് ഷിഫ്റ്റുകളിലായി 20 ലധികം ജീവനക്കാര് മാധ്യമങ്ങളിലെ ഉള്ളടക്കങ്ങള് നിരീക്ഷിക്കും.
പത്രങ്ങള്, ടെലിവിഷന് ചാനലുകള്, പ്രാദേശിക കേബിള് ചാനലുകള്, റേഡിയോ, സാമൂഹമാധ്യമങ്ങള്, എസ്.എം.എസ്/ വോയിസ് മെസേജസ്, തീയറ്ററുകള് ഉള്പ്പെടെയുള്ള മറ്റ് ദൃശ്യശ്രാവ്യ മാധ്യമസങ്കേതങ്ങള്, പൊതുസ്ഥലങ്ങളിലെ വീഡിയോ ഓഡിയോ പ്രദര്ശനം, ഇ പേപ്പറുകള്, വെബ്സൈറ്റുകള്, സ്ഥാനാര്ത്ഥികളുടെയും പാര്ട്ടികളുടേയുംസോഷ്യല് മീഡിയ അക്കൗണ്ടുകള് തുടങ്ങിയവ നിരീക്ഷിക്കും.
രാഷ്ട്രീയ പരസ്യങ്ങള് ടെലിവിഷന്, കേബിള് നെറ്റ് വര്ക്ക്/കേബിള് ചാനലുകള്, സ്വകാര്യ എഫ് എം ചാനലുകള് ഉള്പ്പെടെ റേഡിയോ എന്നിവയില് ടെലികാസ്റ്റ്/ബ്രോഡ്കാസ്റ്റ് ചെയ്യാനും സിനിമാ ഹാളുകളില് പ്രദര്ശിപ്പിക്കാനും പൊതുസ്ഥലങ്ങളില് ഓഡിയോ വിഷ്വല് ഡിസ്പ്ലേ നടത്താനും ഇ-ന്യൂസ് പേപ്പറുകളില് നല്കാനും ബള്ക്ക് എസ്എംഎസ്/വോയ്സ് മെസേജ് നല്കാനും സാമൂഹിക മാധ്യമങ്ങള്, ഇന്ര്നെറ്റ് വെബ്സൈറ്റുകള് എന്നിവയില് നല്കാനും എംസിഎംസിയുടെ മുന്കൂര് അനുമതി നിര്ബന്ധമാണ്. ഇത് കൂടാതെ അച്ചടി മാധ്യമങ്ങളില് വോട്ടെടുപ്പ് ദിവസമോ അതിന് തൊട്ടു മുമ്പത്തെ ദിവസമോ നല്കുന്ന രാഷ്ട്രീയ പരസ്യങ്ങള്ക്കും മുന്കൂര് അനുമതി നിര്ബന്ധമാണ്. അംഗീകൃത രാഷ്ട്രീയ പാര്ട്ടികള്/ഏതെങ്കിലും ഗ്രൂപ്പുകള്/സംഘടന/അസോസിയേഷന്/സ്ഥാനാര്ഥി/വ്യക്തികള് എന്നിവയ്ക്കെല്ലാം ഇത് ബാധകമാണ്.
എം സി സി നോഡല് ഓഫീസറായ എഡിഎം എ ജയശ്രീ, ഇലക്ഷന് ഡെപ്യൂട്ടി കലക്ടര് നിജു കുര്യന്, മീഡിയ സെൻ്റർ
അംഗങ്ങളായ അസിസ്റ്റന്റ് എഡിറ്റര് സൗമ്യ മത്തായി, കെ.എ രതീഷ്, സി.എസ് അശ്വിന്, ലീന പ്രമോദ്, എം.സി. ഭാസ്കരന്, എ.കെ രാജീവന്, എം വിനയചന്ദ്രന്, എന്. ജയ, സി.കെ ആര്യ, ജോയ് തോമസ്, വി.എസ് കാവ്യഞ്ജന എന്നിവര് പങ്കെടുത്തു.
Leave a Reply