‘ദി മോദി ഇറ: ഇൻഡ്യാസ് ജേർണി ഓഫ് ട്രാൻസ്ഫർമേഷൻ’ പ്രകാശനം ചെയ്തു

By ന്യൂസ് വയനാട് ബ്യൂറോ

ബത്തേരി: അഖില സേവക് സമാജ് കൗൺസിൽ സ്ഥാപകനും എഴുത്തുകാരനുമായ ഡോ. ഭാർഗവ് മല്ലപ്പ രചിച്ച ‘ദി മോദി ഇറ: ഇൻഡ്യാസ് ജേർണി ഓഫ് ട്രാൻസ്ഫർമേഷൻ’ എന്ന പുസ്തകം സുൽത്താൻ ബത്തേരിയിൽ പ്രകാശനം ചെയ്തു. ഭാരതത്തിന്റെ വികസന വഴികളും വർത്തമാനകാലത്തെ സ്ഥാനവും ഭാവി കാഴ്ചപ്പാടുകളും വ്യക്തമാക്കുന്ന ഈ പുസ്തകത്തിന്റെ പ്രകാശനം, ഭാരത പ്രധാനമന്ത്രി നരേന്ദ്ര മോദിയുടെ ജന്മദിന വാരാഘോഷങ്ങളുടെ ഭാഗമായാണ് സംഘടിപ്പിച്ചത്. സുൽത്താൻ ബത്തേരി എടത്തറ ഓഡിറ്റോറിയത്തിൽ നടന്ന ചടങ്ങിൽ പ്രമുഖ ആത്മീയ ആചാര്യന്മാർ, ജനപ്രതിനിധികൾ, സാമൂഹിക നേതാക്കൾ, അധ്യാപകർ, തൊഴിലാളി പ്രതിനിധികൾ, മാധ്യമപ്രവർത്തകർ തുടങ്ങിയവർ പങ്കെടുത്തു.

കഴിഞ്ഞ കുറച്ചുകാലമായി ഭാരതത്തിലുണ്ടായ മാറ്റങ്ങളെ അടയാളപ്പെടുത്താനും രാജ്യം കൈവരിച്ച നേട്ടങ്ങളെക്കുറിച്ചും ഭാവി സാധ്യതകളെക്കുറിച്ചുമുള്ള സംവാദങ്ങൾ പ്രോത്സാഹിപ്പിക്കാനുമാണ് പുസ്തകം ലക്ഷ്യമിടുന്നത്. മാസങ്ങൾ നീണ്ട വായനയിലൂടെയും നിരീക്ഷണങ്ങളിലൂടെയും ചിന്തകളിലൂടെയുമാണ് പുസ്തകം രൂപപ്പെടുത്തിയതെന്നും ഈ പ്രകാശനം വരുംദിവസങ്ങളിൽ നടക്കാനിരിക്കുന്ന വലിയ ചർച്ചകളുടെ തുടക്കമാണെന്നും ഗ്രന്ഥകർത്താവ് ഡോ. ഭാർഗവ് മല്ലപ്പ പറഞ്ഞു. പുസ്തകത്തിലെ ആശയങ്ങളെ വായനക്കാർ കൃത്യമായി വീക്ഷിക്കുമെന്നും യുവജനങ്ങളും വിവിധിതര സമൂഹങ്ങളും സ്ഥാപനങ്ങളും ഇത് ചർച്ചയാക്കുമെന്നും പ്രതീക്ഷിക്കുന്നതായും അദ്ദേഹം കൂട്ടിച്ചേർത്തു.

ഭാരതീയ ഹിന്ദു പരിവാർ ദേശീയ ചെയർമാനും റെയിൽവേ മന്ത്രാലയത്തിലെ സോണൽ റെയിൽവേ യൂസേഴ്സ് കൺസൾട്ടേറ്റീവ് കമ്മിറ്റി അംഗവുമായ ഡോ. എസ്. സെൽവഗണേഷ് ചടങ്ങിൽ സ്വാഗതം ആശംസിച്ചു. മധുര അദീനം ശ്രീമത് വിശ്വലിംഗ തമ്പിരാൻ, തിരു രാജശേഖർ സ്വാമികൾ, തവത്തിരു പളനി അടിഗളാർ, മഹാ ശ്രീ യുക്തേശ്വര പരമഹംസ സ്വാമികൾ, ലോക്‌സഭാ എം.പി. കരൺ ഭൂഷൺ സിംഗ്, മൈസൂരു കൃഷ്ണരാജ മണ്ഡലം എം.എൽ.എ. ടി. എസ്. ശ്രീവത്സ, ഉത്തർപ്രദേശ് സംസ്ഥാന പിന്നാക്ക വിഭാഗ കമ്മീഷൻ അംഗം സത്യേന്ദ്ര കുമാർ ബാരി, ബി.ജെ.പി. വയനാട് ജില്ലാ പ്രസിഡന്റ് പ്രശാന്ത് മലവയൽ, ഡോ. സുബ്ബ സോമു, ചന്ദൻ കുമാർ, ഡോ. മഹാലക്ഷ്മി, കലീം ഭാരതി തുടങ്ങിയ വിശിഷ്ടാതിഥികളുടെ സാന്നിധ്യത്തിലാണ് പുസ്തക പ്രകാശനം നടന്നത്. ടിനു രാജൻ അവതരണം നിർവഹിച്ച ചടങ്ങിൽ മനോജ് ശർമ്മ നന്ദി രേഖപ്പെടുത്തി. അഖില സേവക് സമാജ് കൗൺസിലിന്റെ നേതൃത്വത്തിലാണ് പരിപാടി സംഘടിപ്പിച്ചത്.