ആരവം ഫുട്ബോൾ ടൂർണമെന്റ് നാലാം സീസൺ ഡിസംബറിൽ; സംഘാടക സമിതി രൂപീകരിച്ചു

By ന്യൂസ് വയനാട് ബ്യൂറോ

വെള്ളമുണ്ട: കേരളത്തിലെ ഏറ്റവും മികച്ച ഫുട്ബോൾ ടൂർണമെന്റിന്റെ സംഘാടകർക്കുള്ള മികവിന്റെ പുരസ്കാരം നേടിയ വെള്ളമുണ്ട ആരവം ഫുട്ബോൾ ടൂർണമെന്റിന്റെ നാലാം സീസൺ ഡിസംബറിൽ നടക്കും. വെള്ളമുണ്ടയുടെ കായിക മുന്നേറ്റത്തിനും സാന്ത്വന പ്രവർത്തനങ്ങൾക്കും തണലായി നടത്തുന്ന ടൂർണമെന്റിന്റെ ഒരുക്കങ്ങൾ ആരംഭിച്ചു. കേവലം ഒരു കായികമാമാങ്കം എന്നതിലുപരി വലിയൊരു ജീവകാരുണ്യ ദൗത്യം കൂടിയായാണ് ആരവം സീസൺ നാലിലേക്ക് കടക്കുന്നത്. കഴിഞ്ഞകാലങ്ങളിലെ ടൂർണമെന്റുകളിൽ ലഭിച്ച വരുമാനം വെള്ളമുണ്ടയിലെയും പരിസരപ്രദേശങ്ങളിലെയും നിർധനരായ ഭവനരഹിതർക്കും രോഗികൾക്കും വലിയ ആശ്വാസമായിരുന്നുവെന്ന് ഭാരവാഹികൾ വ്യക്തമാക്കി.

വിദേശ താരങ്ങൾ ഉൾപ്പെടെയുള്ള പ്രമുഖ ഫുട്ബോൾ കളിക്കാർ ആരവത്തിലെ വിവിധ ടീമുകളിൽ അണിനിരക്കും. ടൂർണമെന്റിന്റെ വിജയകരമായ നടത്തിപ്പിനായി വിപുലമായ സംഘാടകസമിതി രൂപീകരിച്ചു. കൃഷിമന്ത്രി ടി. സിദ്ദീഖ്, മാനന്തവാടി എം.എൽ.എ ഉഷാ വിജയൻ, ജില്ലാ-ഗ്രാമ-ബ്ലോക്ക് പഞ്ചായത്ത് പ്രസിഡന്റുമാർ ഉൾപ്പെടെയുള്ള ജനപ്രതിനിധികളും വെള്ളമുണ്ട ഗവൺമെന്റ് ഹൈസ്കൂൾ പി.ടി.എ പ്രസിഡന്റ്, പ്രധാന അധ്യാപകർ എന്നിവരുമാണ് മുഖ്യരക്ഷാധികാരികൾ.

സംഘാടക സമിതി ചെയർമാനായി പി.കെ. അമീൻ, ജനറൽ കൺവീനറായി കെ. റഫീഖ്, ട്രഷററായി ജംഷീർ കുനിങ്ങാരത്ത്, കോഡിനേറ്ററായി ടി. അസീസ് എന്നിവരെ തിരഞ്ഞെടുത്തു. റഫീഖ് വെള്ളമുണ്ട, അഷ്കർ തച്ചിൽ എന്നിവരാണ് വർക്കിംഗ് ചെയർമാന്മാർ. ഹമീദ് ഇ.കെ., മുജീബ് മഞ്ചേരി, ടി. നാസർ എന്നിവരെ സംഘാടക സമിതി വർക്കിംഗ് കൺവീനർമാരായും തിരഞ്ഞെടുത്തു.

മത്സരത്തിനായുള്ള മുഴുവൻ ഒരുക്കങ്ങളും പൂർത്തിയായി വരുന്നതായി സംഘാടകർ വാർത്താ സമ്മേളനത്തിൽ അറിയിച്ചു. ചെയർമാൻ പി.കെ. അമീൻ, കൺവീനർ കെ. റഫീഖ്, ട്രഷറർ ജംഷീർ കുനിങ്ങാരത്ത്, സി.എം. അനിൽകുമാർ, നൗഫൽ കുനിങ്ങാരത്ത്, ഹമീദ് കുനിങ്ങാരത്ത്, ഹാരിസ് മിന്നംകോടൻ, മുജീബ് മഞ്ചേരി, സാദിഖ് പാറക്കൽ, സാലിം തോലൻ, ഷഹീർ കുനിങ്ങാരത്ത്, എ.പി. ലത്തീഫ്, കെ.കെ. ഷബീർ എന്നിവർ വാർത്താ സമ്മേളനത്തിൽ പങ്കെടുത്തു.