ഗോത്ര യുവതയ്ക്ക് സൗജന്യ ഡ്രൈവിംഗ് പരിശീലനം: ലൈസന്സ് വിതരണം ഇന്ന്
കല്പ്പറ്റ: വയനാട് ജില്ലയിലെ ഗോത്ര മേഖലയിലുള്ള യുവതീ-യുവാക്കള്ക്കായി ജനമൈത്രി പോലീസിന്റെ ട്രൈബല് ജനമൈത്രി പദ്ധതിയുടെ ഭാഗമായി സംഘടിപ്പിച്ച സൗജന്യ ഡ്രൈവിംഗ് പരിശീലനം വിജയകരമായി പൂര്ത്തീകരിച്ചവര്ക്കുള്ള ലൈസന്സ് വിതരണം ഇന്ന് നടക്കും. ലൈസൻസ് വിതരണോദ്ഘാടനം ജില്ലാ പോലീസ് മേധാവി അരുണ് കെ. പവിത്രന് ഐ.പി.എസ് നിര്വഹിക്കും. ഉച്ചയ്ക്ക് രണ്ടിന് കല്പ്പറ്റ ഗവ. റസ്റ്റ് ഹൗസില് നടക്കുന്ന പരിപാടിയില് ആര്.ടി.ഒ പി. സുമേഷ്, ജില്ലാ അഡിഷണൽ എസ്.പി കെ.എസ്. ഷാജി തുടങ്ങിയവര് പങ്കെടുക്കും. റോഡ് സുരക്ഷയും തൊഴില് അവസരങ്ങളും ലക്ഷ്യമിട്ട് ബോധവല്ക്കരണ ക്ലാസുകളും പ്രായോഗിക പരിശീലനവും ഉള്പ്പെടുത്തി പോലീസിന്റെ നേതൃത്വത്തില് നടപ്പിലാക്കുന്ന പദ്ധതിയാണിത്. ജില്ലയിലെ എല്ലാ സ്റ്റേഷന് പരിധികളില് നിന്നും പോലീസ് തിരഞ്ഞെടുത്ത 104 ഗോത്ര യുവതീ-യുവാക്കള്ക്കായാണ് ന്യൂ ഓസ്കാര് ഡ്രൈവിങ് സ്കൂളുമായി സഹകരിച്ച് പരിശീലനം നല്കി ലൈസന്സ് എടുത്തു നല്കുന്നത്. എസ്.എസ്.എല്.സി, പ്ലസ് ടു പരീക്ഷകളില് ഉന്നത വിജയം നേടിയ ഗോത്ര വിഭാഗത്തിലെ വിദ്യാര്ത്ഥികള്ക്കുള്ള ഉപഹാര സമര്പ്പണവും ഈ ചടങ്ങിന്റെ ഭാഗമായി നടക്കും.
Leave a Reply