November 17, 2026

വെന്റ്വര്‍ത്ത് എസ്റ്റേറ്റിലെ പഴശി ഗുഹ; പഴശിരാജാവിന്റെ ചെറുമകള്‍ സന്ദര്‍ശിക്കും

0
Uyi
Merin S
By ന്യൂസ് വയനാട് ബ്യൂറോ

 

കല്‍പ്പറ്റ: നീലഗിരി ചേരമ്പാടിയിലെ പഴശി ഗുഹയില്‍ പഴശിരാജാവിന്റെ ചെറുമകള്‍ സന്ദര്‍ശനത്തിന് എത്തുന്നു. പഴശി രാജായുടെ നാലാം തലമുറയില്‍പ്പെട്ട ശുഭ വര്‍മയും ഭര്‍ത്താവ് ഡോ.കിഷോറുമാണ് ചേരമ്പാടിയില്‍ വെന്റ്വര്‍ത്ത് എസ്റ്റേറ്റിലുള്ള ഗുഹ നാളെ രാവിലെ എട്ടിന് സന്ദര്‍ശിക്കുന്നത്. പഴശിരാജായുടെ കൊച്ചുമകന്‍ പടിഞ്ഞാറേ കോവിലകം വീരവര്‍മരാജയുടെ മകളാണ് ശുഭ.വൈദേശികാധിപത്യത്തിനെതിരേ പൊരുതിമരിച്ച പൂര്‍വികന്റെ ഓര്‍മ പുതുക്കുന്നതിനാണ് ശുഭ വര്‍മ ചേരമ്പാടിയില്‍ എത്തുന്നതെന്ന് വെന്റ്വര്‍ത്ത് എസ്റ്റേറ്റ് അധികൃതര്‍ പറഞ്ഞു. ഹാരിസണ്‍ മലയാളം പ്ലാന്റേഷന്റെ കൈവശത്തിലാണ് വെന്റ്വര്‍ത്ത് എസ്റ്റേറ്റ്.ചരിത്രപ്രാധാന്യമുള്ളതാണ് ചേരമ്പാടിയിലെ പഴശി ഗുഹ.

1797നും 1801നും ഇടയില്‍ നിര്‍മിച്ചതെന്ന് കരുതുന്ന ഗുഹ രണ്ടാം പഴശി യുദ്ധത്തില്‍ ഗറില്ലാ പോരാട്ട കേന്ദ്രമായിരുന്നു. വയനാട്-നീലഗിരി വനങ്ങളില്‍ പഴശിരാജാ നിര്‍മിച്ച 12 കോട്ടകളില്‍ ഒന്നായ കോട്ടമലക്കോട്ടയുമായി ബന്ധിപ്പിക്കുന്നതാണ് ഗുഹയ്ക്ക് മുന്നിലൂടെയുള്ള റോഡ്.അഞ്ച് തന്ത്രപരമായ തടസങ്ങള്‍ സൃഷ്ടിച്ചാണ് ഗുഹയുടെ രൂപകല്‍പന. ഗുഹയ്ക്കു മുന്നിലെ ജലാശയം പ്രകൃതിദത്ത തടസമാണ്. ഇടുങ്ങിയതാണ് ഗുഹയുടെ പ്രവേശനകവാടം. അകത്തേക്കു കടക്കുന്നതിന് ഇഴഞ്ഞുനീങ്ങണം. കവാടം പിന്നിട്ടാല്‍ വിശാലമായ അറയിലെത്താം. ഗുഹയില്‍ നൂറ് അടി ഉള്ളിലുള്ള കവാടം പ്രതിരോധത്തിന്റെ മറ്റൊരു പാളിയാണ്.നുഴഞ്ഞുകയറുന്നവരെ വഴിതെറ്റിക്കുന്നതിന് രണ്ട് പാതകളും ഗുഹയിലുണ്ട്. ഇടതൂര്‍ന്ന വനത്തിലേക്ക് നയിക്കുന്നതാണ് ശരിയായ പാത.ബ്രിട്ടീഷുകാര്‍ പനമരത്തെ താവളം തകര്‍ത്തതിനുശേഷം പഴശിരാജാ വനങ്ങളിലാണ് അഭയം പ്രാപിച്ചത്. പുല്‍പ്പള്ളി മാവിലാംതോടില്‍ വീരചരമം അടയുംവരെ അദ്ദേഹം ജനങ്ങള്‍ക്കിടയിലാണ് ജീവിച്ചത്. രണ്ടാം പഴശി യുദ്ധത്തില്‍ പടയാളികളെ നഷ്ടപ്പെട്ടതിനുശേഷം പോരാട്ടം തുടരുന്നതിന് അമ്പ്-വില്ല് പ്രയോഗത്തില്‍ പ്രാവീണ്യമുള്ള കുറുമ, കുറിച്യ യോദ്ധാക്കളെയാണ് പഴശിരാജാ ആശ്രയിച്ചിരുന്നത്. വില്ലില്‍ കുലയ്ക്കുന്ന അമ്പ് 90 മീറ്റര്‍ വരെ അകലത്തില്‍ കുറിക്കുകൊള്ളിക്കാന്‍ ശേഷിയുള്ളവരായിരുന്നു ഈ യോദ്ധാക്കളില്‍ പലരും.

Ad
Ad

Leave a Reply

Leave a Reply

Your email address will not be published. Required fields are marked *