ലഹരിമുക്ത ഭാരതം: ജില്ലാതല ഉദ്ഘാടനം ഏപ്രിൽ 10ന് 

By ന്യൂസ് വയനാട് ബ്യൂറോ

സുൽത്താൻ ബത്തേരി: കേന്ദ്ര, കേരള സർക്കാറുകളും സാമൂഹ്യനീതി വകുപ്പും ജില്ലാ ഭരണകൂടവും സംയുക്തമായി സംഘടിപ്പിക്കുന്ന നശാ മുക്ത് ഭാരത് അഭിയാൻ പദ്ധതിയുടെ ജില്ലാതല ഉദ്ഘാടനം ഏപ്രിൽ 10ന് സുൽത്താൻ ബത്തേരിയിൽ നടക്കും. രാവിലെ 10.30ന് ശ്രേയസ് ഓഡിറ്റോറിയത്തിൽ നടക്കുന്ന ചടങ്ങിൽ പട്ടികജാതി പട്ടികവർഗ്ഗ – പിന്നാക്ക ക്ഷേമ വകുപ്പ് മന്ത്രി ഒ ആർ കേളു പദ്ധതിയുടെ ഉദ്ഘാടനം നിർവഹിക്കും.

ഐ സി ബാലകൃഷ്ണൻ എംഎൽഎ അധ്യക്ഷത വഹിക്കുന്ന പരിപാടിയിൽ ജില്ലാ പഞ്ചായത്ത് പ്രസിഡന്റ് സംഷാദ് മരക്കാർ ഉൾപ്പെടെയുള്ള പ്രമുഖർ പങ്കെടുക്കും.

ഉദ്ഘാടനത്തിന് മുന്നോടിയായി രാവിലെ 10ന് സുൽത്താൻ ബത്തേരി സ്വതന്ത്ര മൈതാനിയിൽ നിന്ന് ശ്രേയസ് ഓഡിറ്റോറിയം വരെ വിളംബര ഘോഷയാത്ര സംഘടിപ്പിക്കും. ഈ ഘോഷയാത്ര ജില്ലാ കളക്ടർ ഡി ആർ മേഘശ്രീ ഫ്ലാഗ് ഓഫ് ചെയ്യും.

സുൽത്താൽ ബത്തേരി മുൻസിപ്പാലിറ്റി ചെയർമാൻ ടി കെ രമേശ്‌, വൈസ് ചെയർപേഴ്സൺ എൽസി പൗലോസ്, ഡിവിഷൻ കൗൺസിലർ രാധ രവീന്ദ്രൻ, സബ് ജഡ്ജും ജില്ലാ ലീഗൽ സർവീസ് അതോറിറ്റി സെക്രട്ടറിയുമായ അനീഷ് മാത്യു, എസ്എൽസിഎ കേരള സ്റ്റേറ്റ് കോർഡിനേറ്റർ ടി എം മാത്യു, എക്സൈസ് അസിസ്റ്റന്റ് കമ്മീഷണർ എ ജെ ഷാജി, സുൽത്താൻ ബത്തേരി ഡെപ്യൂട്ടി പോലീസ് സൂപ്രണ്ട് അബ്ദുൾ ഷെരീഫ്, ജില്ലാ സാമൂഹ്യനീതി ഓഫീസർ കെ ജെ ജോൺ ജോഷി, വിവിധ വകുപ്പ് മേധാവികളും പരിപാടിയിൽ സാന്നിധ്യമറിയിക്കും.