വീണ്ടും ഉയര്ന്ന താപനില മുന്നറിയിപ്പ്;പന്ത്രണ്ട് ജില്ലകളില് യെല്ലോ അലര്ട്ട്
തിരുനന്തപുരം:സംസ്ഥാനത്ത് വീണ്ടും ഉയര്ന്ന താപനില മുന്നറിയിപ്പ് തുടരുന്നുവെന്ന് കേന്ദ്ര കാലാവസ്ഥാ വകുപ്പ്. ഇടുക്കിയും വയനാടും ഒഴികെയുള്ള ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. പാലക്കാട്, കൊല്ലം, തൃശൂര് ജില്ലകളില് 37 ഡിഗ്രി സെല്ഷ്യസ് വരെ താപനില ഉയരുമെന്നാണ് മുന്നറിയിപ്പിലുളളത്. തിരുവനന്തപുരം, പത്തനംതിട്ട, ആലപ്പുഴ, കോട്ടയം, എറണാകുളം, മലപ്പുറം, കോഴിക്കോട്, കണ്ണൂര്, കാസര്കോട് ജില്ലകളില് 36 ഡിഗ്രി വരെ താപനില ഉയരാമെന്നാണ് മുന്നറിയിപ്പ്.
അതേസമയം ബംഗാള് ഉള്ക്കടലില് ന്യൂനമര്ദ്ദം ശക്തി പ്രാപിച്ചതിനാല് സംസ്ഥാനത്ത് ഒറ്റപ്പെട്ടയിടങ്ങളില് വേനല്മഴ കിട്ടിയേക്കാനും സാദ്ധ്യതയുണ്ട്.
ചിലയിടങ്ങളില് ഇടിമിന്നലോട് കൂടിയ ഇടത്തരം മഴയ്ക്കും സാദ്ധ്യതയുണ്ട്. തെക്ക് പടിഞ്ഞാറന് ബംഗാള് ഉള്ക്കടലിന് മുകളില് രൂപപ്പെട്ട ന്യൂനമര്ദ്ദം ശക്തി കൂടിയ ന്യൂനമര്ദ്ദമായി മാറി.അടുത്ത 24 മണിക്കൂര് വടക്ക് – വടക്ക് പടിഞ്ഞാറ് ദിശയില് മദ്ധ്യ പടിഞ്ഞാറന് ബംഗാള് ഉള്ക്കടലിനു മുകളിലൂടെ സഞ്ചരിക്കുന്ന ന്യൂനമര്ദ്ദം തുടര്ന്നുള്ള 24 മണിക്കൂറില് വടക്കു -വടക്കു കിഴക്ക് ദിശയില് സഞ്ചരിച്ച് ശക്തി കുറയാനും സാദ്ധ്യതയുണ്ട്. കേരളത്തില് അടുത്ത അഞ്ച് ദിവസം ഇടിമിന്നലോട് കൂടിയ നേരിയ ഇടത്തരം മഴയ്ക്ക് സാദ്ധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു.
Leave a Reply