സുൽത്താൻ ബത്തേരി നഗരസഭയുടെ ‘ഫ്ലൈ ഹൈ’ പദ്ധതി നാലാം വർഷത്തിലേക്ക്

By ന്യൂസ് വയനാട് ബ്യൂറോ

ബത്തേരി: പട്ടികവർഗ വിദ്യാർത്ഥികളെ മത്സരപ്പരീക്ഷകൾക്ക് സജ്ജരാക്കുന്നതിനായി സുൽത്താൻ ബത്തേരി നഗരസഭ നടപ്പാക്കിവരുന്ന നൂതന പദ്ധതിയായ ‘ഫ്ലൈ ഹൈ’ നാലാം വർഷത്തേക്ക് പ്രവേശിച്ചു. ബഹുമാനപ്പെട്ട ജില്ലാ വിദഗ്ധ സമിതിയുടെ അംഗീകാരത്തോടെ കഴിഞ്ഞ മൂന്ന് വർഷമായി വിജയകരമായി നടപ്പാക്കിവരുന്ന ഈ പദ്ധതിയുടെ 2025-26 വർഷത്തെ പ്രവർത്തനങ്ങൾക്കാണ് ഇപ്പോൾ തുടക്കമായിരിക്കുന്നത്.
​കഴിഞ്ഞ മൂന്ന് വർഷങ്ങൾക്കിടയിൽ മികച്ച നേട്ടങ്ങളാണ് ‘ഫ്ലൈ ഹൈ’ പദ്ധതിക്ക് കൈവരിക്കാനായത്. ആറ് വിദ്യാർത്ഥികൾക്ക് 48,000 രൂപ ലഭിക്കുന്ന എൻ.എം.എം.എസ്. (എൻ എം എം എസ് ) സ്കോളർഷിപ്പ്, നാല് പേർക്ക് യു.എസ്.എസ്. (യൂ എസ് എസ് ), മൂന്ന് പേർക്ക് എൽ.എസ്.എസ്. (എൽ എസ് എസ് ) സ്കോളർഷിപ്പുകൾ നേടിക്കൊടുക്കാൻ പദ്ധതിക്ക് കഴിഞ്ഞു. സ്കോളർഷിപ്പ് നേട്ടങ്ങൾക്കപ്പുറം, കുട്ടികളിൽ പഠനത്തോടുള്ള ക്രിയാത്മകമായ സമീപനം വളർത്താനും പദ്ധതി സഹായകമായിട്ടുണ്ട്. സംസ്ഥാനത്തെ പ്രമുഖ വിദ്യാഭ്യാസ സ്ഥാപനങ്ങൾ സന്ദർശിക്കാനും പ്രമുഖ വ്യക്തിത്വങ്ങളുമായി ആശയവിനിമയം നടത്താനുമുള്ള അവസരങ്ങൾ കുട്ടികളുടെ കാഴ്ചപ്പാടുകളിൽ വലിയ മാറ്റം ഉണ്ടാക്കി.
​നാലാം വർഷത്തേക്കുള്ള വിദ്യാർത്ഥികളെ തിരഞ്ഞെടുക്കുന്നതിനുള്ള പ്രവേശന പരീക്ഷയിൽ നഗരസഭാ പരിധിയിൽ നിന്നുള്ള 287 വിദ്യാർത്ഥികൾ പങ്കെടുത്തു. ഡെപ്യൂട്ടി ചെയർപേഴ്സൺ എൽസി പൗലോസ് പരീക്ഷയുടെ ഉദ്ഘാടനം നിർവഹിച്ചു. വിദ്യാഭ്യാസ സ്ഥിരം സമിതി അധ്യക്ഷൻ ടോം ജോസ് അധ്യക്ഷത വഹിച്ചു.
​സ്ഥിരം സമിതി അംഗങ്ങളായ സാലി പൗലോസ്, ഷാമില ജുനൈസ്, കൗൺസിലർമാരായ ജയചന്ദ്രൻ, പ്രിയാവിനോദ്, ഷീബാ ചാക്കോ, ഹോമ എം.സി., ബിന്ദു പ്രമോദ് എന്നിവർ സംസാരിച്ചു. നിർവഹണ ഉദ്യോഗസ്ഥൻ പി.എ. അബ്ദുൾ നാസർ സ്വാഗതവും പ്രധാനാധ്യാപിക ബിജി വർഗ്ഗീസ് നന്ദിയും പറഞ്ഞു.
​പ്രവേശന പരീക്ഷയിലും അഭിമുഖത്തിലും മികവ് തെളിയിക്കുന്ന 14 അധ്യാപകരുടെ നേതൃത്വത്തിൽ ഒഴിവ് ദിവസങ്ങളിലായിരിക്കും അടുത്ത ബാച്ചിലെ കുട്ടികൾക്കായി പരിശീലനം നൽകുക.