മാനന്തവാടി മെത്താംഫെറ്റാമിൻ കേസ്: ഒരാൾ കൂടി അറസ്റ്റിൽ

By ന്യൂസ് വയനാട് ബ്യൂറോ

മാനന്തവാടി എക്സൈസ് റേഞ്ച് ഓഫീസിന്റെ പരിധിയിൽ രജിസ്റ്റർ ചെയ്ത, 80 ഗ്രാം മെത്താംഫെറ്റാമിൻ പിടികൂടിയ എൻ.ഡി.പി.എസ്. ക്രൈം നമ്പർ 05/25 കേസിൽ ഒരാൾ കൂടി അറസ്റ്റിലായി. കോഴിക്കോട് നടുവണ്ണൂർ, മഹിമ വീട്ടിൽ തമാം മുബാരിസ് ആണ് കേസിൽ പുതുതായി അറസ്റ്റിലായ പ്രതി. ഇതോടെ ഈ കേസിൽ അറസ്റ്റിലായവരുടെ എണ്ണം രണ്ടായി.

നേരത്തെ, ഇതേ കേസിൽ നടുവണ്ണൂർ സ്വദേശിയായ അജിനാസിനെ 2025 മെയ് 26-ന് അന്വേഷണസംഘം കസ്റ്റഡിയിലെടുത്തിരുന്നു. തമാം മുബാരിസിന്റെ അറസ്റ്റ്, കേസിലെ മൂന്നാമത്തെയും നാലാമത്തെയും പ്രതികളെ ലക്ഷ്യമിട്ടുള്ള അന്വേഷണത്തിനിടെയാണ് നടന്നതെന്ന് എക്സൈസ് ഉദ്യോഗസ്ഥർ വ്യക്തമാക്കി.

വയനാട് അസിസ്റ്റന്റ് എക്സൈസ് കമ്മീഷണർ വൈ. പ്രസാദിന്റെ മേൽനോട്ടത്തിൽ രൂപീകരിച്ച പ്രത്യേക അന്വേഷണ സംഘമാണ് തമാം മുബാരിസിനെ പിടികൂടിയത്. സിവിൽ എക്സൈസ് ഓഫീസർമാരായ ശ്രീജ മോൾ പി.എൻ., സുഷാദ് പി.എസ്., ജിതിൻ പി.പി., ബേസിൽ സി.എം. എന്നിവരാണ് അന്വേഷണ സംഘത്തിലെ മറ്റ് പ്രധാന അംഗങ്ങൾ.

കേസുമായി ബന്ധപ്പെട്ട് കൂടുതൽ പ്രതികൾ ഉൾപ്പെട്ടിട്ടുണ്ടോ എന്ന കാര്യത്തിൽ എക്സൈസ് സംഘം വിശദമായ അന്വേഷണം നടത്തിവരികയാണ്. ലഹരിമരുന്ന് ശൃംഖലയുടെ ഉറവിടവും വിതരണ മാർഗ്ഗങ്ങളും കണ്ടെത്താനാണ് നിലവിൽ ഊന്നൽ നൽകിയിട്ടുള്ളത്.