കനത്ത മഴ തന്നെ; ഇന്ന് 12 ജില്ലകളില് യെല്ലോ അലര്ട്ട്; ഇടിമിന്നല്, ശക്തമായ കാറ്റ്
തിരുവനന്തപുരം: സംസ്ഥാനത്ത് ഇന്നും കനത്ത മഴ തുടരും. 12 ജില്ലകളില് ഇന്ന് യെല്ലോ അലര്ട്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളിലാണ് മുന്നറിയിപ്പ്. വെള്ളിയാഴ്ച വരെ മഴ തുടരുമെന്നാണ് കാലാവസ്ഥാ വകുപ്പിന്റെ പ്രവചനം. മണിക്കൂറില് 30 മുതല് 40 കിലോമീറ്റര് വരെ വേഗതയില് ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.തെക്ക്-കിഴക്കന് ബംഗാള് ഉള്ക്കടലില് ഇന്ന് പുതിയ ന്യൂനമര്ദ്ദം രൂപപ്പെട്ടേക്കുമെന്നാണ് കാലാവസ്ഥ വകുപ്പിന്റെ വിലയിരുത്തല്. ഈ സാഹചര്യത്തില് ഈ മാസം 24 വരെ സംസ്ഥാനത്ത് ശക്തമായ മഴ തുടരുമെന്ന് കാലാവസ്ഥ വകുപ്പ് അറിയിച്ചു. ഇടിമിന്നലിനും ശക്തമായ കാറ്റിനും സാധ്യതയുള്ളതിനാല് ജനങ്ങള് അതീവ ജാഗ്രത പാലിക്കണമെന്നും അധികൃതര് നിര്ദേശിച്ചു.
ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില് 64.5 മില്ലിമീറ്ററില് മുതല് 115.5 മില്ലിമീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്ഥമാക്കുന്നത്.
ന്യൂനമര്ദ്ദ പാത്തി
അറബിക്കടല് ന്യൂനമര്ദ്ദത്തില് നിന്നു കേരള തീരത്തിനു സമീപം തെക്ക് കിഴക്കന് അറബിക്കടലിനു മുകളിലൂടെ തെക്ക് കിഴക്കന് ബംഗാള് ഉള്ക്കടല് വരെ ന്യൂന മര്ദ്ദ പാത്തിയും സ്ഥിതി ചെയ്യുന്നു. ഈ മാസം 24 വരെ ഒറ്റപ്പെട്ട ശക്തമായ മഴയ്ക്കും, 22, 23, 24 തീയതികളില് ഒറ്റപ്പെട്ട അതി ശക്തമായ മഴയ്ക്കും സാധ്യത.
മത്സ്യത്തൊഴിലാളി ജാഗ്രത നിര്ദേശം
കേരള – കര്ണാടക – ലക്ഷദ്വീപ് തീരങ്ങളില് ഈ മാസം 24 വരെ മത്സ്യബന്ധനത്തിന് പോകാന് പാടില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു.
തെക്കന് ബംഗാള് ഉള്ക്കടല്, അതിനോട് ചേര്ന്ന മധ്യ പടിഞ്ഞാറന് ബംഗാള് ഉള്ക്കടല് എന്നിവിടങ്ങളില് ആഴക്കടലില് മത്സ്യബന്ധനം നടത്തുന്നവര് ഇന്ന് രാവിലെയോടെ തീരത്തേക്ക് മടങ്ങണമെന്ന് നിര്ദ്ദേശിക്കുന്നു.
ഇന്ന് തെക്കു കിഴക്കന് അറബിക്കടല്, അതിനോട് ചേര്ന്ന പ്രദേശങ്ങളിലും മണിക്കൂറില് 45 മുതല് 55 കിലോമീറ്റര് വരെയും ചില അവസരങ്ങളില് 65 കിലോമീറ്റര് വരെയും വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യത. തമിഴ്നാട് തീരം, ഗള്ഫ് ഓഫ് മന്നാര്, കന്യാകുമാരി പ്രദേശം, തെക്കു കിഴക്കന് അറബിക്കടല്, അതിനോട് ചേര്ന്ന തെക്കു പടിഞ്ഞാറന് അറബിക്കടല്, മധ്യ പടിഞ്ഞാറന് അറബിക്കടല്, മധ്യ കിഴക്കന് അറബിക്കടല്, തെക്കന് ബംഗാള് ഉള്ക്കടല്, ആന്ഡമാന് കടല് എന്നിവിടങ്ങളില് മണിക്കൂറില് 35 മുതല് 45 കിലോമീറ്റര് വരെയും ചില അവസരങ്ങളില് 55 കിലോമീറ്റര് വരെയും വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യത.
Leave a Reply