By ന്യൂസ് വയനാട് ബ്യൂറോ

കൽപ്പറ്റ: നിയമസഭാ തിരഞ്ഞെടുപ്പിന്റെ വിജ്ഞാപനം വന്നതോടെ വയനാട് ജില്ലയിലെ രാഷ്ട്രീയ ചിത്രം തെളിയുന്നു. സ്ഥാനാർത്ഥി നിർണ്ണയ ചർച്ചകൾ പൂർത്തിയാക്കി മുന്നണികൾ പടയൊരുക്കം തുടങ്ങിക്കഴിഞ്ഞു. സിറ്റിംഗ് എം.എൽ.എമാരും പുതുമുഖങ്ങളും ഏറ്റുമുട്ടുന്ന ഇത്തവണത്തെ തിരഞ്ഞെടുപ്പ് ജില്ലയിൽ പ്രവചനാതീതമായ പോരാട്ടത്തിനാണ് വഴിയൊരുക്കുന്നത്.

ബത്തേരിയിൽ ‘മാസ്റ്റർ’ പോരാട്ടം

സുൽത്താൻ ബത്തേരിയിൽ യു.ഡി.എഫിന്റെ കരുത്തനായ സിറ്റിംഗ് എം.എൽ.എ ഐ.സി. ബാലകൃഷ്ണൻ തന്നെ ഇത്തവണയും ജനവിധി തേടും. മണ്ഡലത്തിലെ വികസന പ്രവർത്തനങ്ങളും ജനകീയ സ്വാധീനവുമാണ് ഐ.സി. ബാലകൃഷ്ണന് തുണയാകുന്നത്. എന്നാൽ, അദ്ദേഹത്തെ നേരിടാൻ എൽ.ഡി.എഫ് രംഗത്തിറക്കുന്നത് പൊതുപ്രവർത്തന രംഗത്തെ സജീവ സാന്നിധ്യമായ എം.എസ്. വിശ്വനാഥനെയാണ്. മുൻപ് കെ.പി.സി.സി സെക്രട്ടറിയായിരുന്ന വിശ്വനാഥൻ സി.പി.ഐ.എമ്മിൽ ചേർന്ന ശേഷം നേരിടുന്ന പ്രധാന വെല്ലുവിളിയാണിത്. ഗോത്രവർഗ്ഗ മേഖലകളിലെ സ്വാധീനവും വ്യക്തിബന്ധങ്ങളും ഇരുവർക്കും നിർണ്ണായകമാകും.

കൽപ്പറ്റയിൽ ജുനൈദ് കൈപ്പണിക്ക് സാധ്യത

കൽപ്പറ്റയിൽ യു.ഡി.എഫിന്റെ ടി. സിദ്ദിഖിനെ നേരിടാൻ എൽ.ഡി.എഫ് പാളയത്തിൽ നിന്ന് യുവനേതാവ് ജുനൈദ് കൈപ്പണിക്കാണ് സാധ്യത. മണ്ഡലം തിരിച്ചുപിടിക്കാൻ ആർ.ജെ.ഡി (RJD) പ്രതിനിധിയായ ജുനൈദിന് കഴിയുമെന്നതാണ് പ്രതീക്ഷ. ബി.ജെ.പി ജില്ലാ പ്രസിഡന്റ് പ്രശാന്ത് മലവയൽ കൂടി എത്തുന്നതോടെ കൽപ്പറ്റയിൽ ത്രികോണ മത്സരത്തിനുള്ള സാധ്യതകൾ ഏറുകയാണ്.

മാനന്തവാടിയിൽ വനിതാ പ്രതിരോധം

മന്ത്രി ഒ.ആർ. കേളുവിന്റെ കോട്ട തകർക്കാൻ യു.ഡി.എഫ് വനിതാ കരുത്തിനെയാണ് പരിഗണിക്കുന്നത്. മീനാക്ഷി രാമൻ, ഉഷാ വിജയൻ എന്നിവരിൽ ഒരാൾ യു.ഡി.എഫ് സ്ഥാനാർത്ഥിയായി എത്തുന്നതോടെ മാനന്തവാടിയിലും ആവേശം ഇരട്ടിയാകും.