സ്പെയിൻ ജയിച്ചാൽ കുഴിമന്തി സൗജന്യം: വാക്ക് പാലിക്കാൻ അമ്പലവയലിലെ വ്യാപാരി; നാളെ 1000 പേർക്ക് മന്തി വിതരണം ചെയ്യും

By ന്യൂസ് വയനാട് ബ്യൂറോ

അമ്പലവയൽ: ഫുട്ബോൾ ലോകകപ്പിൽ തന്റെ പ്രിയപ്പെട്ട ടീമായ സ്പെയിൻ ചാമ്പ്യൻമാരായാൽ അമ്പലവയലുകാർക്ക് സൗജന്യമായി കുഴിമന്തി നൽകുമെന്ന വാഗ്ദാനം പാലിക്കാനൊരുങ്ങി പച്ചക്കറി വ്യാപാരിയായ ഷജീർ സീസൺ. ഫുട്ബോൾ ആവേശത്തിനിടയിൽ പച്ചക്കറി കടയിൽ തമാശ പങ്കുവെക്കുന്നതിനിടെയാണ് സ്പെയിൻ കിരീടം നേടുമെന്ന അടിയുറച്ച വിശ്വാസത്തിൽ ഷജീർ ഈ വൈറൽ പ്രഖ്യാപനം നടത്തിയത്. പിന്നീട് നാടൊട്ടുക്കും ഇതേറ്റെടുക്കുകയായിരുന്നു. ചില സാങ്കേതിക കാരണങ്ങളാൽ ഇന്ന് വിതരണം ചെയ്യാൻ സാധിച്ചില്ലെങ്കിലും നാളെ രാവിലെ 10 മണിക്ക് ശേഷം 1000 പേർക്ക് മന്തി വിതരണം ചെയ്യാനുള്ള ഒരുക്കങ്ങൾ പൂർത്തിയായതായി ഷജീർ അറിയിച്ചു.