ഗാന്ധി ദർശൻ വേദി ഹരിതവേദിയുടെ സംസ്ഥാന തല ഉദ്‌ഘാടനം 25 ന്

 കേരളത്തിൽ  തരിശുകിടക്കുന്ന കൃഷിയോഗ്യമായ  ഭൂമി  ഹരിത വേദി യൂണിറ്റുകൾ രൂപീകരിച്ച്  അംഗങ്ങൾ  ഒറ്റയ്ക്കും കൂട്ടായും അടുക്കളത്തോട്ടം, മാതൃകാ കൃഷിത്തോട്ടം, പശു വളർത്തൽ, കോഴി വളർത്തൽ, തേനീച്ച വളർത്തൽ തുടങ്ങി എല്ലാത്തരം  കാർഷിക പ്രവർത്തനങ്ങളും ഏറ്റെടുക്കും. 

 യുവജനങ്ങളുൾപ്പെടെ  എല്ലാ വിഭാഗം ജനങ്ങളെയും കൃഷിയിൽ  വ്യാപൃതരാക്കുന്നതിനുവേണ്ടി ഗ്രോ ബഗ് കൃഷിയും പ്രത്യേകം തയ്യാറാക്കിയ പച്ചക്കറി സ്റ്റാൻഡിലുള്ള മട്ടുപ്പാവ് കൃഷിയും പ്രോത്സാഹിപ്പിച്ചു കൊണ്ട് പുതിയ  കാർഷിക സംസ്കാരത്തിന് ഹരിത വേദി തുടക്കം കുറിക്കും.    മത്മാഗാന്ധിയുടെ സ്വാശ്രയ ഗ്രാമങ്ങളും ഗ്രാമീണ സമ്പദ് വ്യവസ്ഥയും പിൻപറ്റി എല്ലാ ഭവനങ്ങളിലും അവരവർക്കാവശ്യമായ ധാന്യങ്ങൾ, കിഴങ്ങുവർഗ്ഗങ്ങൾ, പച്ചക്കറികൾ, പാൽ, മുട്ട, മാംസം തുടങ്ങിയ ഭക്ഷ്യവസ്തുക്കൾ ഉദ്പാദിപ്പിച്ച് കൃഷി വ്യായാമത്തിനും ആരോഗ്യത്തിനും പര്യാപ്തമാക്കുകയാണ് ലക്ഷ്യം.

പ്രകൃതി വിഭവങ്ങൾ സംരക്ഷിച്ചുകൊണ്ടും പ്രകൃതി ചൂഷണം നിയന്ത്രിച്ചുകൊണ്ടും വിഭാവനം ചെയ്തിരിക്കുന്ന ഹരിത വേദി കൃഷി  കർഷകർക്ക് സമൂഹത്തിൽ മാന്യതയും അംഗീകാരവും ലാഭകരമായ തൊഴിലും പ്രധാനം ചെയ്യുന്ന തരത്തിലാണ് ആവിഷ്കരിച്ചിട്ടുള്ളത്. 

വനിത ഗാന്ധിദർശൻ വേദി അംഗങ്ങളുടെയും  ബാല ഗാന്ധിദർശൻ അംഗങ്ങളുടെയും സഹകരണത്തോടെ ഗ്രാമീണരെയും നാഗരികരെയും സംഘടിപ്പിച്ച് സർക്കാർ ആനുകൂല്യങ്ങളുൾപ്പെടെ ലഭ്യമാക്കി വിപുലമായ തോതിൽ കൃഷി ചെയ്യാനുള്ള പദ്ധതികളാണ് ആസൂത്രണം ചെയ്തിരിക്കുന്നത്. 

വിദേശത്ത് നിന്ന് മടങ്ങി എത്തിയിട്ടുള്ളവരെ ഉൾപ്പെടുത്തി പ്രവാസി ഗാന്ധി ദർശൻ വേദി കാർഷികോൽപന്നങ്ങളുടെ സംസ്കരണവും മൂല്യവർദ്ധിത ഉൽപന്നങ്ങളുടെ ഉൽപാദനവും നടത്തും. ആധുനിക വിവര സാങ്കേതിക സങ്കേതങ്ങളുപയോഗിച്ച് ഗാന്ധി ഹരിതഗ്രാമം ഉൽപന്നം എന്ന് ബ്രാൻഡ് ചെയ്താകും വിപണനം.

ഹരിതവേദിയുടെ പ്രവർത്തനങ്ങൾ  സംസ്ഥാനത്ത് ഡോ.എം.സി. ദിലീപ് കുമാർ അധ്യക്ഷനും ഡോ. നെടുമ്പന അനിൽ ജനറൽ സെക്രട്ടറിയുമായ കേരളാ പ്രദേശ് ഗാന്ധി ദർശൻ വേദിയുടെ കീഴിലായിരിക്കും. 

ഹരിതവേദി ഫീൽഡ് പ്രവർത്തനം സംഘടിപ്പിക്കുന്നതും

 ഏകോപിപ്പിക്കുന്നതും ചീഫ് കോർഡിനേറ്റർമാരായ  ഇടുക്കിയിലെ  ടി. ജെ പീറ്ററും (ഉൽപാദന വിഭാഗം) പത്തനംതിട്ടയിലെ  ബിനു എസ് ചെക്കാലയിലും (വൈജ്ഞാനിക വിഭാഗം) ഓർഗനൈസേഷൻ വിഭാഗം കോർഡിനേറ്ററായ  വയനാട്ടിലെ  ഇ.വി എബ്രഹാമുമാണ്.

ഹരിതവേദിയുടെ സംസ്ഥാന തല ഉദ്‌ഘാടനം മെയ് 25 ന് തൊടുപുഴയിൽ കെ.സി.വേണുഗോപാൽ നിർവ്വഹിക്കും.

കാലടി സർവകലാശാല മുൻ വൈസ് ചാൻസലർ ആയിരുന്ന ഡോക്ടർ എം.സി. ദിലീപ്കുമാർ അധ്യക്ഷനായ ഗാന്ധിദർശൻ വേദി യുടെ നിയന്ത്രണത്തിലുള്ള ഹരിത വേദിക്ക് ഉപദേശകരായി കേരളത്തിലെ പ്രമുഖരായ  കാർഷിക ശാസ്ത്രജ്ഞരുടെയും വിദഗ്ദരുടെയും സമിതി പ്രവർത്തിക്കുന്നു.