വിനോദിന്റെ കരവിരുതിൽ തെങ്ങു കൊണ്ടൊരു വാദ്യസംഘം

പനമരം: വയനാട്ടിൽ സംഘടിപ്പിക്കുന്ന ഏത് പൊതു പരിപാടിക്കും കലാസൃഷ്ടികൾ കൊണ്ട് തന്റേതായ നിലയിൽ വ്യക്തിമുദ്ര പതിപ്പിക്കുന്ന ആർട്ടിസ്റ്റ് വിനോദ് ഇത്തവണത്തെ ജില്ലാ സ്കൂൾ കലോത്സവത്തിലും വ്യത്യസ്തനായി. തെങ്ങിൻ തടിയും മട്ടലും തെങ്ങോലകളും കൊണ്ട് പനമരം ഗവ: ഹയർ സെക്കണ്ടറി സ്കൂൾ മുറ്റത്തെ വാകമരച്ചുവട്ടിൽ വിനോദ് നിർമ്മിച്ച വാദ്യസംഘത്തിന്റെ മാതൃക കലോത്സവത്തിനെത്തുന്ന ആരെയും ആകർഷിക്കുന്നതാണ്. തേങ്ങയും ചകിരിയും ഓലയും ഈർക്കിലും വരെ ഈ കലാരൂപത്തിന് ഉപയോഗിച്ചിട്ടുണ്ട്. ചെണ്ട, കുഴൽ, തകിൽ തുടങ്ങി വാദ്യസംഘത്തിലെ എല്ലാ കലാകാരൻമാരുടെയും രൂപങ്ങൾ ഇതിൽ മനോഹരമായി ഒരുക്കിയിട്ടുണ്ട്.