വയനാടിനെ മാതൃകാ മണ്ഡലമാക്കി മാറ്റുമെന്ന് എന്‍.ഡി.എ സ്ഥാനാര്‍ത്ഥി തുഷാര്‍ വെള്ളാപ്പള്ളി.
കല്‍പ്പറ്റ: വയനാടിനെ മാതൃകാ മണ്ഡലമാക്കി മാറ്റും എന്ന് എന്‍ഡിഎ സ്ഥാനാര്‍ത്ഥി തുഷാര്‍ വെള്ളാപ്പള്ളി. ദേശീയ രാഷ്ട്രീയത്തിലെ കള്ളനാണയങ്ങളെ പുറത്തുകൊണ്ടുവരാനുള്ള നിമിത്തമാവും ഇക്കുറി വയനാട് ലോക്‌സഭാ മണ്ഡലം. പാരമ്പര്യത്തിന്റെ മഹിമ പാടുന്ന ഇന്ത്യന്‍ നാഷണല്‍ കോണ്‍ഗ്രസിന്റെയും ആദര്‍ശരാഷ്ട്രീയത്തിന്റെ അപ്പോസ്തലന്മാരായി നടിക്കുന്ന ഇടതുപാര്‍ട്ടികളുടെയും പൊയ്മുഖം ഇവിടെ അഴിഞ്ഞു വീണു കഴിഞ്ഞു. വിളിച്ചാല്‍ കേള്‍ക്കുന്ന ദൂരത്ത് അതിര്‍ത്തിക്കപ്പുറത്ത് ഒരേ മുന്നണിക്കാരായി നിന്ന് വോട്ടു ചോദിക്കുന്നവര്‍ വയനാട്ടില്‍ പരസ്പരം ഏറ്റുമുട്ടുന്നതിനെ എന്ത് പേരിട്ടാണ് വിളിക്കേണ്ടത്. ഈ രാഷ്ട്രീയ പൊള്ളത്തരം തന്നെയാണ് ജനങ്ങളുടെ മുന്നില്‍ ഉന്നയിക്കുന്നതെന്നും തുഷാര്‍ പറഞ്ഞു. വയനാട്ടിലെ വോട്ടര്‍മാര്‍ ഈ കപടവേഷക്കാരെ ഇനിയെങ്കിലും തിരിച്ചറിഞ്ഞ് പ്രവര്‍ത്തിക്കണം. ആധുനിക ഇന്ത്യയുടെ ഉയര്‍ത്തെഴുന്നേല്‍പ്പിന് നേതൃത്വം നല്‍കുന്ന ഇന്ത്യന്‍ പ്രധാനമന്ത്രി നരേന്ദ്രമോദിയുടെ വികസന സ്വപ്‌നങ്ങളും ഭരണനൈപുണ്യവും മലയാളമണ്ണില്‍ എത്തിക്കുക എന്ന ദൗത്യത്തിന് ശക്തിപകരുകയാണ് ലക്ഷ്യം. ഇടതു വലതുമുന്നണികളുടെ വികല രാഷ്ട്രീയനയങ്ങള്‍ ശിഥിലമാക്കിയ നാടാണ് വയനാട്. ദീര്‍ഘവീക്ഷണത്തോടെയുള്ള വികസന പദ്ധതികള്‍ ഒന്നുപോലും ഇവിടെ ഉണ്ടായിട്ടില്ല.
പൊന്നുവിളയിച്ചിരുന്ന വയനാടന്‍ കൃഷിഭൂമികള്‍ ഇന്ന് കര്‍ഷകരുടെ ശവപ്പറമ്പാണ്. ആരോഗ്യമേഖല ശോചനീയം. ആദിവാസി ക്ഷേമപദ്ധതികള്‍ ശതകോടികള്‍ കൊള്ളയടിക്കാനുള്ള മാര്‍ഗങ്ങള്‍ മാത്രമായി മാറി. രാത്രിയാത്രാ നിരോധനം നീക്കല്‍, വയനാട് ചുരം റോഡിന് ബദല്‍ റോഡ്, രണ്ട് തവണ തറക്കല്ലിട്ടിട്ടും നടക്കാതെ പോയ വയനാട് മെഡിക്കല്‍ കോളേജ് സഫലമാക്കല്‍, കര്‍ഷകര്‍ക്ക് പ്രത്യേക രക്ഷാ പാക്കേജ്, വന്യജീവി അക്രമം ഒഴിവാക്കാനുള്ള നടപടികള്‍, കൃഷിക്കും കുടിവെള്ളത്തിനും ഉപകരിക്കുന്ന ചാലിയാര്‍ നദീതട പദ്ധതി, നിലമ്പൂര്‍ നഞ്ചന്‍കോട് റെയില്‍പാത, നിലമ്പൂരില്‍ ലോകോത്തരമായ മരവ്യവസായ ഹബ്, പാവപ്പെട്ടവര്‍ക്ക്‌തൊഴില്‍ദാന പദ്ധതി തുടങ്ങിയ കാര്യങ്ങള്‍ക്കാണ് തിരഞ്ഞെടുക്കപ്പെട്ടാല്‍ മുന്‍തൂക്കം നല്‍കുക. വയനാട്ടിലേക്ക് റെയില്‍പാത എന്ന ബ്രിട്ടീഷുകാരുടെ പദ്ധതി നൂറ്റാണ്ടിനിപ്പുറം സഫലമാക്കാനാകുള്ള കഠിനപ്രയത്‌നവും ഉണ്ടാകും. നരേന്ദ്ര മോദി സര്‍ക്കാരിന്റെ ജില്ലാ ആസ്പിരേഷണല്‍ പദ്ധതിക്കായി രാജ്യത്ത് തിരഞ്ഞെടുത്ത 115 പിന്നാക്ക ജില്ലകളിലൊന്ന് വയനാടായിരുന്നു. വിദ്യാഭ്യാസം, ആരോഗ്യം, അടിസ്ഥാനസൗകര്യം, ദാരിദ്ര്യലഘൂകരണം തുടങ്ങിയ മേഖലകളില്‍ സമഗ്ര വികസനത്തിന് പരിധിയില്ലാത്ത സാമ്പത്തികസഹായം നല്‍കുന്ന ഈ പദ്ധതി വയനാടിന്റെ പ്രശ്‌നങ്ങളള്‍ക്കൊക്കെ പരിഹാരമാകേണ്ടതായിരുന്നു. എന്നാല്‍ കേവല രാഷ്ട്രീയത്തിന്റെ പേരില്‍ ഈ പദ്ധതിയില്‍ താല്പര്യമില്ലെന്ന് കേന്ദ്രസര്‍ക്കാരിനെ അറിയിച്ച് അത് നഷ്ടപ്പെടുത്തി കേരള സര്‍ക്കാര്‍. ഒരു പിന്നാക്ക ജില്ലയെ കൈപിടിച്ചുയര്‍ത്താന്‍ ലഭിച്ച അസുലഭമായ അവസരം നഷ്ടപ്പെടുത്തി വയനാടന്‍ ജനതയെ വഞ്ചിച്ചവരോട് മാപ്പില്ലെന്ന് പറയാനുള്ള അവസരം കൂടിയാണ് ഈ തിരഞ്ഞെടുപ്പ്. സമഗ്രവികസനവും സംശുദ്ധമായ രാഷ്ട്രീയവുമാണ് എന്‍ഡി എ മുന്നോട്ടുവയ്ക്കുന്നത്. കപട വാഗ്ദാനങ്ങളില്ല, തേന്‍വാക്കുകളില്ല, വയനാടിന്റെ പുരോഗതിയാണ് ലക്ഷ്യം. ജനങ്ങളോട് ചേര്‍ന്ന് നിന്ന് ഇന്ത്യയ്ക്ക് തന്നെ മാതൃകയാക്കാവുന്ന ഒരു മണ്ഡലമായി വയനാടിനെ മാറ്റും എന്നും തുഷാര്‍ പറഞ്ഞു.
Leave a Reply