പ്രളയാന്തര പുനരധിവാസ പ്രവര്‍ത്തനങ്ങള്‍ വിലയിരുത്തി
ജില്ലയിലെ പ്രളയാനന്തര പുനരധിവാസ പ്രവര്‍ത്തനങ്ങളുടെ പുരോഗതി വിലയിരുത്താന്‍ റവന്യൂ പ്രിന്‍സിപ്പല്‍ സെക്രട്ടറി ഡോ.വി.വേണുവിന്റെ അധ്യക്ഷതയില്‍ കളക്‌ട്രേറ്റില്‍ യോഗം ചേര്‍ന്നു. ജിയോളജിക്കല്‍ സര്‍വ്വെ ഓഫ് ഇന്ത്യ നടത്തിയ പഠന റിപ്പോര്‍ട്ട് പ്രകാരം വാസയോഗ്യമല്ലെന്ന് കണ്ടെത്തിയ സ്ഥലങ്ങളില്‍ താമസിക്കുന്നവരെ മഴക്കാലത്തിന് മുമ്പ് സുരക്ഷിത സ്ഥലങ്ങളിലേക്ക് മാറ്റിപ്പാര്‍പ്പിക്കുന്നതിനുളള നടപടികള്‍ സ്വീകരിക്കണമെന്ന് അദ്ദേഹം ഉദ്യോഗസ്ഥര്‍ക്ക് നിര്‍ദ്ദേശം നല്‍കി. നാഷണല്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജിയിലെ വിദഗ്ധരടങ്ങിയ സംഘം താലൂക്കുകളില്‍ പരിശോധന നടത്തി വരികയാണെന്നും ഇവരുടെ റിപ്പോര്‍ട്ട് കൂടി പരിഗണിച്ചായിരിക്കും ഇത്തരം പ്രദേശങ്ങളിലെ പുനരധിവാസം പ്രവര്‍ത്തനങ്ങള്‍ നടത്തുകയെന്നും ജില്ലാ കളക്ടര്‍ എ.ആര്‍ അജയകുമാര്‍ പറഞ്ഞു. പ്രളയത്തില്‍ നാശനഷ്ടങ്ങള്‍ സംഭവിച്ചവര്‍ക്കുളള ധനസഹായ വിതരണവും യോഗത്തില്‍ വിലയിരുത്തി. പൂര്‍ണ്ണമായും ഭാഗീകമായും വീടുകള്‍ നഷ്ടപ്പെട്ടവര്‍ക്കും വീടും സ്ഥലവും നഷ്ടപ്പെട്ടവര്‍ക്കും സര്‍ക്കാര്‍ പ്രഖ്യാപിച്ച ധനസഹായം വിതരണം ചെയ്യുന്ന നടപടികള്‍ ത്വരിതപ്പെടുത്തണം. ഓരോ ഘട്ടത്തിലേയും പുരോഗതി ബന്ധപ്പെട്ട ഉദ്യോഗസ്ഥന്‍ വിലയിരുത്തി അര്‍ഹതക്കനുസരിച്ച് പണം നല്‍കണമെന്നും പ്രിന്‍സിപ്പല്‍ സെക്രട്ടറി പറഞ്ഞു. വിവിധ താലൂക്കുകളില്‍ നടക്കുന്ന പുനരധിവാസ പ്രവര്‍ത്തനങ്ങളുടെ പുരോഗതി യോഗത്തില്‍ തഹസില്‍ദാര്‍മാര്‍ വിശദീകരിച്ചു. എ.ഡി.എം കെ. അജീഷ്,സബ്കളക്ടര്‍ എന്‍.എസ്.കെ ഉമേഷ്, ഡെപ്യൂട്ടി കളക്ടര്‍മാര്‍,മറ്റ് റവന്യൂ ഉദ്യോഗസ്ഥന്‍മാര്‍ തുടങ്ങിയവര്‍ പങ്കെടുത്തു.
Leave a Reply