എം.പി. രാഹുൽജിയുടെ ആദ്യ വരവിൽ സ്റ്റാറായി ഐ.സി.യുടെ മക്കളും :സ്നേഹത്തെക്കുറിച്ച് മാത്രം പ്രസംഗിച്ച് മടക്കം.

സ്നേഹം പ്രസംഗിച്ചും പ്രകടിപ്പിച്ചും വയനാട്ടിൽ നിന്ന് രാഹുൽ മടങ്ങി. 

സി.വി.ഷിബു. 

കൽപ്പറ്റ:  ഏവരും രാഹുൽജി എന്ന് വിളിക്കുന്ന  കോൺഗ്രസ് അധ്യക്ഷൻ രാഹുൽ ഗാന്ധി  റെക്കോർഡ് ഭൂരിപക്ഷത്തിൽ തന്നെ വിജയിപ്പിച്ചതിന്  നന്ദി പറയാൻ എത്തി മടങ്ങിയത് ജനലക്ഷങ്ങളുടെ ഹൃദയം കീഴടക്കിയാണ്. മൂന്ന് ദിവസത്തെ സന്ദർശനത്തിൽ  ജനങ്ങളോട് നന്ദി പറയാൻ എത്തിയ എല്ലാ സ്ഥലങ്ങളിലും സ്നേഹത്തെക്കുറിച്ച് മാത്രമാണ് പറഞ്ഞത്. സ്നേഹത്തെക്കുറിച്ച് പ്രസംഗിക്കുക മാത്രമല്ല കണ്ടുമുട്ടിയവരോടെല്ലാം ആ സ്നേഹം പ്രകടിപ്പിച്ചും അവരിൽ പലർക്കും ആവോളം സ്നേഹം നൽകിയുമാണ് മടങ്ങിയത്.  അവരെയെല്ലാം പ്രായഭേദമന്യേ തന്നോട് ചേർത്ത് നിർത്താനും മറന്നില്ല. ഏറ്റവും താഴെ തട്ടിലുള്ളവരെപോലും പ്രധാനമായി കാണുന്ന തരത്തിലായിരുന്നു പെരുമാറ്റവും ശരീരഭാഷയും. 

       സുരക്ഷാ കാര്യത്തിൽ ഇസഡ് പ്ലസ് വിഭാഗത്തിലായതിനാൽ  എസ്.പി.ജി. യും സംസ്ഥാന പോലീസും ചേർന്ന് കനത്ത സുരക്ഷയും സന്ദർശക നിയന്ത്രണവും ഏർപ്പെടുത്തിയിരുന്നെങ്കിലും അവയെല്ലാം ഭേദിച്ചാണ് രാഹുൽ ജനങ്ങളിലേക്കിറങ്ങിയത്. കെട്ടിപ്പിടിക്കാനും ഫോട്ടോക്ക് പോസ് ചെയ്യാനും സെൽഫിക്ക് വഴങ്ങാനും മാത്രമല്ല വയനാടിനെയും വയനാട്ടുക്കാരെയും അടുത്തറിയാനാണ് മൂന്ന് ദിവസവും രാഹുൽ ശ്രമിച്ചത്. യഥാർത്ഥത്തിൽ വരും വർഷങ്ങളിലേക്കുള്ള വലിയ ചുവടുവെയ്പിന്റെ ചെറിയ ഗൃഹ പാഠമായിരുന്നു ഈ സന്ദർശനം. 

      കുട്ടികളോട്  ഏറെ അടുപ്പം കാണിച്ച രാഹുൽ അടുത്ത തലമുറയെയും തന്നിലേക്കടുപ്പിക്കാൻ ശ്രമിച്ചു. കാണാൻ ആഗ്രഹിച്ചവരെയും അപ്രതീക്ഷിതമായി കണ്ടവരെയും ഒരു പോലെ  സംതൃപ്തരാക്കി. ആദ്യ വരവിൽ മോഹന വാഗ്ദാനങ്ങൾ നൽകാതെയും എന്നാൽ വികസനത്തിന്റെ കാര്യത്തിൽ ആരേയും നിരാശരാക്കാതെയും നിയന്ത്രണത്തോടെയുള്ള ഭാഷണങ്ങളിൽ വയനാടിന്റെ പ്രശ്നങ്ങൾ ഉൾപ്പെടുത്താനും ശ്രമിച്ചു. 

    എം.പി. യെന്ന നിലയിൽ രാഹുലിന്റെ ആദ്യ വരവിൽ അനേകം പേരാണ് താരങ്ങളായി മാറിയത്. അക്കൂട്ടത്തിൽ പ്രധാനികളായി  മാറിയവരിൽ വയനാട് ഡി.സി.സി പ്രസിഡണ്ട് ഐ.സി. ബാലകൃഷ്ണന്റെ മക്കളും ഉൾപ്പെടുന്നു. ഐ.സിയുടെ മൂത്ത മകൾ കാവ്യ കൃഷ്ണ ശനിയാഴ്ച വയനാട്ടിൽ നടന്ന റോഡ് ഷോയിൽ രാഹുലിനൊപ്പം  മുഴുവൻ സമയവും പങ്കെടുത്തിരുന്നു. ഇളയ മക്കളായ  ആര്യ കൃഷ്ണയും  അഭിന്യ കൃഷ്ണയും ഞായറാഴ്ച    കൽപ്പറ്റ റസ്റ്റ് ഹൗസിലെത്തി.  കൂടെ നിർത്തി ഫോട്ടോയെടുത്ത   രാഹുൽ കുട്ടികൾക്ക് നല്ല ഭാവിയും ആശംസിച്ചു. മുൻകൂട്ടി നിശ്ചയിച്ചിരുന്ന റോഡ് ഷോ കൂടാതെ ആൾക്കൂട്ടത്തെ കണ്ട എല്ലായിടങ്ങളിലും  വാഹനത്തിൽ നിന്നിറങ്ങി  അഭിവാദ്യം ചെയ്തു.ഞായറാഴ്ച ഉച്ചക്ക് രണ്ട് മണിക്ക് പ്രത്യേക വിമാനത്തിലാണ് ഡൽഹിക്ക് മടങ്ങിയത്. ill