എടപ്പെട്ടിയുടെ ആഘോഷമായി മലബാറിലെ ആദ്യത്തെ ഇരട്ടകളുടെ സംഗമം

കൽപ്പറ്റ:  കൽപ്പറ്റക്കടുത്ത് എടപ്പെട്ടിയിൽ നടന്ന ഇരട്ടകളുടെ സംഗമം നാടിന്റെ ആഘോഷമായി.  മലബാറിലെ ആദ്യത്തെ ഏറ്റവും വലിയ ഇരട്ടകളുടെ സംഗമത്തിൽ കാസർഗോഡ് മുതൽ മലപ്പുറം വരെയുള്ള ജില്ലകളിലെ ജാതി മത – പ്രായ ഭേദമന്യേ  270 ഇരട്ടകൾ പങ്കെടുത്തു. 

      എടപ്പെട്ടിയെന്ന കൊച്ചുഗ്രാമത്തിൽ പത്തിലധികം  വീടുകളിൽ ഇരട്ടകൾ ഉണ്ടന്ന് തിരിച്ചറിഞ്ഞതിനെ തുടർന്ന്  സെന്റ് സെബാസ്റ്റ്യൻസ് പള്ളി വികാരി ഫാ: തോമസ് ജോസഫ് തേരകമാണ് ഇരട്ടകളുടെ സംഗമം നടത്താൻ ആശയമിട്ടത്. തുടർന്ന് രജിസ്ട്രേഷൻ ആരംഭിച്ചതോടെയാണ് വിവിധ പ്രായത്തിലുള്ള ഇരട്ടകളും  ഒറ്റ പ്രസവത്തിൽ മൂന്ന് കുട്ടികളുള്ള കുടുംബങ്ങളും പരിപാടിക്ക് രജിസ്റ്റർ ചെയ്തത്. ഇരട്ടകളായ വൈദികർ, അഭിഭാഷകർ, സൈനികർ , കലാകാരൻമാർ, ഭിന്നശേഷിക്കാർ തുടങ്ങി 130 ലധികം കുടുംബങ്ങളിൽ നിന്നുള്ളവർ യുഗ്മ 2019 എന്ന പേരിൽ സംഘടിപ്പിച്ച സംഗമത്തിനെത്തി. ഉത്തരാഖണ്ഡിൽ ആർമിയിൽ ജോലി ചെയ്യുന്ന ജവാൻമാരായ കൽപ്പറ്റ അമ്പിലേരിയിലെ ഇരട്ടകളായ  ജിതിൻ സുരേഷ്, നിതിൻ സുരേഷ്  എന്നിവരെയും  ഇരട്ടകളായ ദമ്പതിമാരെയും ഇരട്ടകളായ വൈദികരും വിവിധ മേഖലകളിൽ മികവ് തെളിയിച്ച ഇരട്ടകളെയും പ്രത്യേകമായി ആദരിച്ചു. 

അഞ്ച് മാസം പ്രായമുള്ള കുട്ടികൾ മുതൽ 68 വയസ്സുള്ള ഇരട്ടകൾ വരെയും 

        ഒറ്റ പ്രസവത്തിൽ മൂന്ന് മക്കൾ വീതമുള്ള മൂന്ന് കുടുംബങ്ങളും  പരിപാടിക്കെത്തി. മാനന്തവാടി കണിയാരത്തെ നസീർ അഷിത ദമ്പതികൾ ഒറ്റ പ്രസവത്തിൽ  തങ്ങൾക്കുണ്ടായ  ലാമിയ, ലെയ്ക്ക, ലെയ് ഷ എന്നിവരുമായാണ് സംഗമത്തിൽ പങ്കെടുത്തത് .ബത്തേരി മൂലങ്കാവിലെ റാത്തപ്പള്ളിൽ അഭിലാഷ് ജിംഷ ദമ്പതികൾ തങ്ങളുടെ അഞ്ച് വയസ്സുകാരായ എയ്ഡൻ മാത്യു, എമ്മ മറിയ, മിഷേൽ അന്ന എന്നിവരുമായും മൂന്നാനക്കുഴി കളപ്പുരക്കൽ വിനോദും ഭാര്യ ഷീജയും ഒറ്റ പ്രസവത്തിൽ ജനിച്ച   ഏബൽ അഗസ്റ്റ്യൻ മാത്യൂ, എയ്ഡൻ കുര്യൻ മാത്യു, സെറ എലിസബത്ത് മാത്യൂ എന്നിവരെയും കൂട്ടിയാണ് സംഗമത്തിലേക്കെത്തിയത്. 

     പരിപാടി ഉദ്ഘാടനം ചെയ്ത ഐ.സി. ബാലകൃഷ്ണൻ എം.എൽ. എ യുടെ പി.എ. ഷാജിയും ഇരട്ട സഹോദരനായ ഷിബുവിനൊപ്പമെത്തി. വയനാട് ജില്ലാ കലക്ടർ എ.ആർ. അജയകുമാർ ആദരിക്കൽ ചടങ്ങിന് തുടക്കം കുറിച്ചു. മാനന്തവാടി രൂപത  വികാരി ജനറാൾ മോൺസിഞ്ഞോർ അബ്രാഹം നെല്ലിക്കൽ അധ്യക്ഷത വഹിച്ചു.  മുൻ എം.എൽ. എ എൽ.ഡി. അപ്പച്ചൻ, ഡോ. ജമാലുദ്ദീൻ ഫാറൂഖി  ,ഫാ .. തോമസ് ജോസഫ് തേരകം, ഗ്രാമ പഞ്ചായത്തംഗം  സുന്ദർരാജ്, 

കെ .രാമദാസ് കളത്തിൽ,  അഡ്വ.രാജി, ട്രസ്റ്റി മാത്യു കൊച്ചാലുങ്കൽ  എന്നിവർ പ്രസംഗിച്ചു.