പാലിയേറ്റീവ് പദ്ധതിക്ക് ലൈബ്രറി കൗണ്‍സില്‍ തുടക്കം കുറിക്കുന്നു: ഓര്‍മ്മദിനത്തില്‍ ഒരു സ്വാന്ത്വനം

      വയനാട് ജില്ലയിലെ ഡയാലിസിസിന് വിധേയരാകുന്ന നിര്‍ധനരായ രോഗികളെ സഹായിക്കുന്നതിനായുളള ഒരു പാലിയേറ്റീവ് പദ്ധതിക്ക് ലൈബ്രറി കൗണ്‍സില്‍ തുടക്കം കുറിക്കുകയാണ്. څഓര്‍മ്മദിനത്തില്‍ ഒരു സ്വാന്ത്വനംچ  എന്ന പേരില്‍       ആരംഭിക്കുന്ന പദ്ധതി  ജന്മദിനം ,ചരമദിനം, വിവാഹ വാര്‍ഷികം തുടങ്ങി സന്തോഷം നല്‍കുന്നതും നൊമ്പരപ്പെടുത്തുന്നതുമായ ഓര്‍മദിനങ്ങള്‍ നമ്മുടെ കുടുംബത്തില്‍മാത്രം ആചരിക്കുകയും ആഘോഷിക്കുകയും ചെയ്യുന്ന പതിവ് രീതികളെ മാറ്റി വേദന അനുഭവിക്കുന്ന ആയിരക്കണക്കിന് ഡയാലിസിസ് രോഗികള്‍ക്ക് സഹായമെത്തിക്കുന്ന തരത്തിലാണ് രൂപം നല്‍കിയിട്ടുളളത്.

     പദ്ധതിയിലൂടെ ഒരുദിവസം ജില്ലയിലെ ഒരു രോഗിക്ക് ഡയാലിസിസ് ചെയ്യുന്നതിനാവശ്യമായ തുക കണ്ടെത്തുകയാണ് ഈ പദ്ധതിയിലൂതെ ലക്ഷ്യമിടുന്നത്. ഇതിനായി ജില്ലയിലെ 200 ഗ്രന്ഥശാലകളിലെ പ്രവര്‍ത്തകര്‍ ഗ്രന്ഥശാല പ്രവര്‍ത്തിക്കുന്ന        പ്രദേശത്തെ ചുരുങ്ങിയത് 10 വീടുകളില്‍നിന്നും ഓര്‍മ്മദിനം സാമൂഹ്യ നന്മയ്ക്ക്    ആചരിക്കുന്നവരെ കണ്ടെത്തി തുക പഞ്ചായത്ത്തല ലൈബ്രറി നേതൃസമിതികള്‍ മുഖേന ജില്ലാ ലൈബ്രറി കൗണ്‍സില്‍ സമാഹരിക്കും. ജില്ലാ ലൈബ്രറി കൗണ്‍സില്‍ ജില്ലാ ആരോഗ്യ വിഭാഗവുമായി ബന്ധപ്പെട്ട് അര്‍ഹരായ ഡയാലിസിസ് രോഗികളെ കണ്ടെത്തി ഡയാലിസിസ് കേന്ദ്രങ്ങള്‍ക്ക് തുക കൈമാറും. പദ്ധതിയിലൂടെ സമാഹരിക്കുന്ന തുകയുടെ വരവ് ചെലവ് കണക്കുകള്‍ ഔദ്യോഗിക ഓഡിറ്റിന് വിധേയമാക്കുമെന്ന് ജില്ലാ ലൈബ്രറി കൗണ്‍സില്‍ ഭാരവാഹികള്‍ വാര്‍ത്താകുറിപ്പില്‍ അറിയിച്ചു.

     2020 ഓഗസ്ത് 13 ന് പദ്ധതിയുടെ തുക സമാഹരണം ഔപചാരികമായി ആരംഭിക്കുകയും 2020 സെപ്തംബര്‍ 14 ഗ്രന്ഥശാലാ ദിനത്തില്‍ ഒരു ഡയാലിസിസ് രോഗിയുടെ ചെലവ് തുക കൈമാറി സ്വാന്ത്വനം പദ്ധതി ആരംഭിക്കുന്നതുമാണ്. പദ്ധതിയില്‍ ജില്ലയിലെ സാമൂഹിക ,രാഷ്ട്രീയ , സാഹിത്യ, സാംസ്കാരിക രംഗത്തെ വ്യക്തികളും സ്ഥാപനങ്ങളും  പങ്കാളികള്‍ ആകും.

      ജില്ലയില്‍ കോവിഡ് കാലത്ത് ഏറ്റവുമധികം ബുദ്ധിമുട്ടുകള്‍ അനുഭവിക്കുന്ന രോഗികള്‍ക്ക് വലിയൊരു സഹായമായിരിക്കും ഈ പദ്ധതി. ഇതിന്‍റെ വിജയത്തിനായി എല്ലാവരുടേയും സഹായം ഭാരവാഹികള്‍ അഭ്യര്‍ത്ഥിച്ചു. വാര്‍ത്താ സമ്മേളനത്തില്‍ ജില്ലാ ലൈബ്രറി കൗണ്‍സില്‍ സെക്രട്ടറി പി.കെ.സുധീര്‍, പ്രസിഡന്‍റ് ടി.ബി.സുരേഷ്,  എ.വി.മാത്യു എന്നിവര്‍ പങ്കെടുത്തു.