കൂട് മത്സ്യകൃഷി മന്ത്രി ജെ.മേഴ്സികുട്ടിയമ്മ നാളെ ഉദ്ഘാടനം ചെയ്യും
റീ ബില്ഡ് കേരളയുടെ ഭാഗമായി ബാണാസുര സാഗര് അണക്കെട്ടില് ആരംഭിക്കുന്ന കൂട് മത്സ്യകൃഷി പദ്ധതിയുടെ ഉദ്ഘാടനം നാളെ (സെപ്തംബര് 8) രാവിലെ 11 ന് ഫിഷറീസ് വകുപ്പ് മന്ത്രി ജെ.മേഴ്സികുട്ടിയമ്മ ഓണ്ലൈനായി നിര്വ്വഹിക്കും. അണക്കെട്ട് പരിസരത്തെ കുറ്റിയാം വയലില് നടക്കുന്ന ചടങ്ങില് സി.കെ ശശീന്ദ്രന് എം.എല്.എ അധ്യക്ഷത വഹിക്കും.
ഫിഷറീസ് വകുപ്പിന്റെ ജനകീയ മത്സ്യകൃഷി, മത്സ്യ സമൃദ്ധി പദ്ധതികളുടെ ഭാഗമായാണ് ബാണാസുര സാഗര് അണക്കെട്ടിലും പദ്ധതി നടപ്പാക്കുന്നത്. ജലാശയത്തില് പ്രത്യേകം കൂടുകള് സ്ഥാപിച്ച് അതില് മത്സ്യ കുഞ്ഞുങ്ങളെ നിക്ഷേപിച്ച് വളര്ത്തുന്നതാണ് പദ്ധതി. ബാണാസുര സാഗര് പട്ടിക വര്ഗ മത്സ്യത്തൊഴിലാളി റിസര്വോയര് സഹകരണ സംഘത്തിലെ അംഗങ്ങളാണ് പദ്ധതിയുടെ ഗുണഭോക്താക്കള്. അംഗങ്ങളെ 10 പേര് വീതമുളള ഒമ്പത് ഗ്രൂപ്പുകളാക്കി തിരിച്ചാണ് പദ്ധതി നടപ്പാക്കുന്നത്. ഒരു ഗ്രൂപ്പിന് 6*4*4 സൈസിലുളള 10 കൂടുകള് വീതം ആകെ 90 കൂടുകളാണ് നല്കുക. ഒരു കൂട്ടില് 3840 മത്സ്യകുഞ്ഞുങ്ങളെ വളര്ത്താനാകും. ഇത്തരത്തില് ആകെ 3,45,600 മത്സ്യകുഞ്ഞുങ്ങളെയാണ് ഫിഷറീസ് വകുപ്പ് വിവിധ ഘട്ടങ്ങളാലായി നിക്ഷേപിക്കുന്നത്. ഗിഫ്റ്റ് തിലാപ്പിയ ഇനത്തില്പ്പെട്ട മത്സ്യകുഞ്ഞുങ്ങളെയാണ് ആദ്യഘട്ടത്തില് നിക്ഷേപിക്കുന്നത്. വര്ഷത്തില് രണ്ട് തവണ വിളവെടുപ്പ് നടത്താനാകും.
Leave a Reply