സംഗീത ചിത്രകലാധ്യാപകരെ ഉടൻ നിയമിക്കും: ഉദ്യോഗാർത്ഥികൾ നിരാഹാര സമരം അവസാനിപ്പിച്ചു.

       എസ്.എസ്.എ ക്ക് പകരമായി ആരംഭിച്ച സമഗ്ര ശിക്ഷ അഭിയാൻ പദ്ധതിയിൽ ഉൾപ്പെടുത്തി സംഗീത ചിത്രകലാ അധ്യാപകർക്ക് ഉടൻ നിയമനം നൽകും .കേന്ദ്ര നിർദ്ദേശ പ്രകാരം ശമ്പളം ഏഴായിരം രൂപയാണ്. മുമ്പ് ജോലിയിൽ ഇവരോടൊപ്പമുണ്ടായിരുന്ന ഉദ്യോഗാർത്ഥികൾക്ക് 28000 രൂപ ശമ്പളം ലഭിക്കുന്നുണ്ട്. പുതിയതായി ജോലിയിൽ പ്രവേശിക്കുന്നവർക്ക് സംസ്ഥാന സർക്കാരിന്റെ വിഹിതവും ചേർത്ത് വർദ്ധിപ്പിച്ച ശമ്പളം നൽകുന്നതിന് ഉത്തരവിറക്കും.  മുമ്പ് നൃത്ത ,നാടക അധ്യാപക ഉദ്യോഗാർത്ഥികൾ കോടതിയിൽ നിന്ന് നിയമനം നിർത്തിവെക്കണമെന്ന് ആവശ്യപ്പെട്ട സമ്പാദിച്ച  സ്റ്റേ ഉത്തരവിന്റെ കാലാവധി അവസാനിച്ചതിനാൽ സർക്കാരിന് നടപടികൾ വേഗത്തിലാക്കാൻ കഴിയുമെന്നും ചർച്ചയിൽ സമരക്കാരെ അറിയിച്ചു. ഇതു സംബന്ധിച്ച് സംസ്ഥാന സർക്കാരിന്റെ ഉത്തരവുകൾ ഉടൻ ഇറങ്ങുമെന്ന പ്രതീക്ഷയിലാണ് സമരം അവസാനിപ്പിക്കുന്നതെന്ന് കലാ കായിക ഉദ്യോഗാർത്ഥി സംഘടനയായ എ.പി.ഇ.എ.യുടെ ഭാരവാഹികൾ പറഞു.

   സംഘടനാ പ്രവർത്തകരായ ഐ. ദേവസ്യ, വി.ബി. സജീഷ്, എം.ജി. വിനോദ് , ഐ.പി. രഞ്ജിത്ത്, സി.കെ. അനിൽ എന്നിവരാണ് ഇതുവരെ കൽപ്പറ്റ കലക്ട്രേറ്റിന് മുന്നിലെ സമരപന്തലിൽ നിരാഹാരമനുഷ്ഠിച്ചത്.

       സമരക്കാർക്ക് കെ.എസ്.ടി.എ. ജില്ലാ സെക്രട്ടറി വിനീഷ് നാരങ്ങാനീര് നൽകി നിരാഹാരം അവസാനിപ്പിച്ചു.  ഭാരവാഹികളായ കെ.ജെ. ജേക്കബ്ബ്, പി.വി. മനോജ്, രഞ്ജിനി ,എ .ഐ .വൈ .എഫ്. പ്രതിനിധി ഫാരീസ് തുടങ്ങിയവർ സംസാരിച്ചു.