അക്ഷരങ്ങളുടെ ദീപ പ്രഭയില് ഇന്ന് വിജയ ദശമി
കൽപ്പറ്റ : അസുരശക്തിക്കും അധര്മ്മത്തിനും മേല് ധര്മം വിജയിച്ചതിന്റെ പ്രതീകമായി ഇന്ന് വിജയദശമി. അസുര ചക്രവര്ത്തിയായ മഹിഷാസുരനെ വധിച്ച് ദേവി വിജയം നേടിയ ദിനമാണ് വിജയ ദശമിയായി ആഘോഷിക്കുന്നത്. വിജയദശമിയുമായി ബന്ധപ്പെട്ട് മറ്റ് ചില ഐതിഹ്യങ്ങളും നിലവിലുണ്ട്. ശ്രീരാമന് രാവണനെ നിഗ്രഹിച്ച് ധര്മ്മ വിജയം നേടി തിരിച്ചെത്തിയ സുദിനമായി കാണുന്നതാണ് ഇതില് ഒന്ന്.
മറ്റൊരു കഥ ഇങ്ങനെയാണ്, പാണ്ഡവര് അജ്ഞാതവാസക്കാലത്ത് ആയുധങ്ങള് ശമീവൃക്ഷ ചുവട്ടിലാണ് സൂക്ഷിച്ചിരുന്നത്. അജ്ഞാത വാസം പൂര്ത്തിയായതിന് ശേഷം ശ്രീകൃഷ്ണന് പറഞ്ഞത് പ്രകാരം ആയുധങ്ങള് തിരിച്ചെടുത്തു. ഇതിന് ശേഷം ധര്മ്മ യുദ്ധത്തിനായുള്ള പുറപ്പാടിന്റെ ദിനമാണ് വിജയദശമി എന്നും പറയപ്പെടുന്നു. ഏതായാലും അന്തിമമായി അധര്മ്മം പരാജയപ്പെടുകയും ധര്മ്മം വിജയിക്കുകയും ചെയ്യും എന്നാണ് മൂന്ന് ഐതിഹ്യങ്ങളും പറഞ്ഞ് വെക്കുന്നത്.
മഹിഷാസുര വധവുമായി ബന്ധപ്പെട്ട ഐതിഹവുമുണ്ട്. ദേവിയുടെ മൂന്ന് ഭാവങ്ങളാണ് ഈ മൂന്ന് ദിവസങ്ങളില് ആരാധിക്കപ്പെടുന്നത്. ദുര്ഗാഷ്ടമി ദിനത്തില് ദേവിയെ ദുര്ഗയായും മഹാനവമി ദിനത്തില് ലക്ഷ്മിയായും വിജയദശമി ദിനത്തില് സരസ്വതിയായും സങ്കല്പ്പിച്ചുള്ള പൂജകളാണ് നടക്കുക
വിദ്യയുടെ ദേവിയായ സരസ്വതിയെ ആരാധിക്കുന്നതിനാല് വിജയ ദശമി ദിവസത്തില് തന്നെയാണ് കുരുന്നുകള് ആദ്യാക്ഷരം കുറിക്കുന്നതും.
വിജയദശമിദിവസം കുട്ടികളെ ഗുരുനാഥന് മടിയിലിരുത്തി ‘ഹരിഃശ്രീ ഗണപതയേ നമഃ എന്നു കൈവിരല് കൊണ്ട് എഴുതിക്കുന്നതാണ് എഴുത്തിനിരുത്തലിലെ പ്രധാന ചടങ്ങ്. ജില്ലയിലെ വിവിധ കേന്ദ്രങ്ങളില് വിജയദശമിയെ വരവേല്ക്കുവാന് ഒരുങ്ങിക്കഴിഞ്ഞു . വിജയദശമി ദിനത്തില് വാഗ്ദേവതയുടെ വരദാനം ഏറ്റുവാങ്ങി കുരുന്നുകള് അക്ഷരലോകത്തേക്ക് പിച്ചവയ്ക്കുന്നു.
Leave a Reply