നിലമ്പൂർ-നഞ്ചൻകോട് റെയിൽ പാത: കേന്ദ്ര റെയിൽവേ മന്ത്രിയുടെ ശ്രദ്ധയിൽപ്പെടുത്തുമെന്ന് ഗവർണർ

 ബത്തേരി: നിലമ്പൂർ-നഞ്ചൻകോട്  റെയിൽ പാതയുടെ നിലവിലെ അവസ്ഥ കേന്ദ്ര റെയിൽവേ മന്ത്രിയുടെ ശ്രദ്ധയിൽ കൊണ്ടുവരുമെന്ന്‌ ഗവർണർ ആരിഫ് മുഹമ്മദ് ഖാൻ. റെയിൽ പാതയുടെ പ്രവർത്തന പുരോഗതി  സംബന്ധിച്ച് മലബാർ ഡവലപ്മെൻറ് കൗൺസിൽ, നീലഗിരി-വയനാട് എൻ.എച്ച്‌. ആൻറ് റെയിൽവേ ആക്ഷൻ കമ്മിറ്റി ഭാരവാഹികളുമായുളള ചർച്ചയിലാണ് ഗവർണർ ഇക്കാര്യം വ്യക്തമാക്കിയത്.നിലമ്പൂർ-നഞ്ചൻകോട്  റെയിൽപാത യാഥാർഥ്യമാക്കാൻ ആവശ്യമായ എല്ലാസഹായങ്ങളും ഗവർണർ ഉറപ്പ്നൽകി.2016ൽ കേന്ദ്ര സർക്കാർ അനുമതി നൽകിയ പദ്ധതിയുടെ ഡി.പി.ആർ തയ്യാറാക്കാൻ ഡി.എം.ആർ.സിയെയാണ് ചുമതലപ്പെടുത്തിയത്‌. ഇ. ശ്രീധരന്റെ നേതൃത്തിൽ ഡി.എം.ആർ.സി തയ്യാറാക്കിയ പാതയുടെ അലൈൻമെൻറിന് കർണാടക സർക്കാർ അംഗീകാരം നൽകുകയും ബന്ദിപ്പൂർ വനത്തിൽ  കടന്നുപോകേണ്ട ഭാഗത്തിന്റെ രുപ രേഖതയ്യാറാക്കുന്നതിന്‌ കേന്ദ്ര വനംപരിസ്ഥിതി മന്ത്രാലയത്തിന്റെ അംഗീകാരം ലഭിക്കാൻ ഡി.പി.ആർ തയ്യാറാക്കുന്ന എജൻസിയായ ഡി.എം.ആർ.സി വഴി അപേക്ഷ നൽകാൻ കർണാടക സർക്കാർ 2017 നവംബറിൽ കേരള സർക്കാരിനോട് ആവശ്യപ്പെടുകയും ചെയ്തിരുന്നു. എന്നാൽ ഇതിന് തയ്യാറാകാതെ ഡി.എം.ആർ.സിയെ തന്നെ പുറത്താക്കി തലശ്ശേരി- മൈസൂർ റെയിൽപാതക്ക്‌ വേണ്ടി കേന്ദ്രസർക്കാറിൻറെയോ കർണാടകയുടെയോ അനുമതിയില്ലാതെ സർവെ നടത്താൻ ശ്രമിക്കുകയാണ് കേരള സർക്കാർ ചെയ്‌തത്. ഇതിനായി കോടിക്കണക്കിന് രൂപയും ചിലവാക്കി. പദ്ധതിക്ക്‌ അംഗികാരം ലഭിക്കില്ലന്ന് ബോധ്യമായതോടെ അതിൽനിന്ന്‌ പിൻമാറേണ്ടിയും വന്നു. ഈ സാഹചര്യത്തിലാണ്‌ എല്ലാ അംഗീകാരവും ലഭിച്ചു കഴിഞ്ഞ നിലമ്പൂർ – നഞ്ചൻകോട്  പാത കേരള സർക്കാർ തഴയരുതെന്ന ആവശ്യം ഉയരുന്നത്.